नवलपरासीमा आफ्नै बुहारीलाई जिउँदै जलाएर हत्या गर्ने प्रयास गरेको आरोपमा सासू पक्राउ परेकी छन्।
पश्चिम नवलपरासीको रामग्राम नगरपालिका वडा नंं १७ पट्खौलीकी ५० वर्षीय कमली देवी हरिजनलाई प्रहरीले पक्राउ गरेको हो।
जिल्ला प्रहरी कार्यालय पश्चिम नवलपरासीका सूचना अधिकारी प्रहरी नायव उपरीक्षक वीरदत्त पन्तले २७ वर्षीय शर्मिला हरिजनको जाहेरीको आधारमा सोधपुछको लागि कमली देवीलाई कार्यालयमा राखिएको जानकारी दिए।
प्रहरी नायब उपरीक्षक पन्तका अनुसार शर्मिलाले शनिबार राति आफूलाई मट्टितेल खन्याएर आगो लगाई जिउँदै जलाउने प्रयास गरेको भन्दै आफ्नै सासू कमली देवी, विष्णु हरिजन र गजेन्द्र हरिजनविरूद्ध प्रहरीमा निवेदन दिएकी थिइन्।
सोही निवेदनको आधारमा कमली देवीलाई नियन्त्रणमा लिएर सोधपुछ भइरहेको पन्तले बताए।
‘अहिले निवेदन दिने शर्मिला र आरोपित कमली देवी दुवै पक्षलाई कार्यालयमा बोलाएर वास्तविक घटनाबारे बुझ्ने काम भइरहेको छ,’ पन्तले भने।
प्रहरी नायब उपरीक्षक पन्तले पीडित भनिएकी शर्मिलाले दिएको निवेदनको आधारमा घटनास्थलमा गई हेर्दा कोठामा केही लत्ताकपडा जलेको पाइए पनि शर्मिलाको शरीरमा भने त्यस्तो कुनै चोटपटक लागेको नदेखिएको बताए।
प्रहरी नायब उपरीक्षक पन्तका अनुसार कमली देवी प्रहरी नियन्त्रणमा रहे पनि विष्णु र गजेन्द्र हरिजन भने फरार छन्।
शर्मिलाका पति हाल अस्ट्रेलियामा छन्। उनले श्रीमान् विदेशमा रहेको र आफूमाथि शारीरिक तथा मानसिक हिंसाका घटना हुँदै आएको प्रहरी सामु बताएकी छन्। प्रहरी नायब उपरीक्षक पन्तले निवेदन प्राप्त भएपछि घटनाबारे अनुसन्धान सुरू गरिएको जानकारी दिए।
-1746009348.jpg)
