सशस्त्र प्रहरी महानिरीक्षक राजु अर्यालले निर्वाचनको समयमा आवश्यकताअनुसार खटिन र त्यसका लागि आदेश कुरिरहन नपर्ने बताएका छन्।
गण्डकी प्रदेशका विभिन्न जिल्लामा निर्वाचन सुरक्षा स्थिति बुझ्ने क्रममा प्रहरी, निर्वाचन प्रहरी, सेना लगायत अन्य निकायसँग समन्वय र सहयोगका लगि तत्काल खटिन परेमा आदेश लिइरहन नपर्ने बताएका हुन्।
उनले भूकम्प जस्ता प्रकोपमा स्वतः परिचालन भएजस्तै निर्वाचनको समयमा पनि स्वतः परिचालित हुन र परिचालन पश्चात मुख्यालयमा जानकारी गराउन निर्देशन दिए।
‘आदेशको पर्खाइमा नबस्नुहोस्, सुरक्षात्मक कारवाहीका लागि तत्काल परिचालन भएर जानकारी गराउनुहोस्, आदेश कुर्नु पर्दैन, यही स्थायी आदेश हो,’ उनले भने।
मंगलबार उनले सशस्त्र प्रहरी बल नेपाल नं. २४ कालिका गण कास्की मातहत परिचालन हुने निर्वाचन प्रहरीहरूलाई समेत पूर्ण आत्मविश्वासकासाथ निर्वाचनमा परिचालन भई निर्वाचन सुरक्षामा खटिनु पर्नेमा जोड दिए।
सोही दिन उनले स्याङजा र पाल्पा जिल्लाका सशस्त्र प्रहरी बल नेपालका युनिटहरू पुगेर निर्वाचन सुरक्षा बारे जानकारी लिएका थिए।
निर्वाचन विथोल्न खोज्नेहरूको प्रयास विफल बनाउन सबै सुरक्षा निकायका सुरक्षाकर्मीबीच समन्वय र सहकार्य जरुरी रहेको उनले बताए। उनले निष्पक्ष निर्वाचन र मतदाताको सुरक्षामा कुनै कमीकमजोरी नगर्न निर्देशन दिए।
-1746009348.jpg)
