काठमाडौं उपत्यकाका सबै जिल्लाले एसइई परीक्षाको कापी जाँच सकेर नतिजा र उत्तर पुस्तिका राष्ट्रिय परीक्षा बोर्डमा बुझाइसकेका छन्।
यसपालि जाँच सकिएको तीन दिनभित्र कापी जाँचेर सक्ने तयारी थियो। त्यसै अनुसार उपत्यकाका तीनै जिल्ला काठमाडौं, ललितपुर र भक्तपुरका जिल्ला शिक्षा विकास तथा समन्वय इकाईहरूले एसईइको नतिजा र उत्तपुस्तिका बुझाएका हुन्।
सबभन्दा पछिल्लो पटक काठमाडौं जिल्लाले शुक्रबार दिउँसो सम्पूर्ण नतिजा र उत्तरपुस्तिका बुझाएको बोर्डले जनाएको छ। ललितपुर र भक्तपुरले यसअघि नै बुझाइसकेका छन्।
काठमाडौं जिल्ला शिक्षा विकास तथा समन्वय इकाई प्रमुख समन्तमणि आचार्यले आज शुक्रबार उत्तरपुस्तिकाहरू पठाउन गाडीमा लोड भइरहेको जानकारी दिए।
'काठमाडौं जिल्लामा धेरै परीक्षा केन्द्रहरू भएकाले संकलन गर्न र बुझ्न समय लाग्यो। आज अन्तिम दुईवटा विद्यालयको उत्तरपुस्तिका बुझेर परीक्षा बोर्डमा पठाउन लागेका छौं, त्यो सँगै हाम्रो जिम्मेवारी सकिन्छ,' उनले भने।
सरकारले तोकेकै समयमा काम सकेको पनि उनले बताए। काठमाडौंमा १३४ वटा परीक्षा केन्द्र थिए। त्यसमा लगभग ४० हजारभन्दा बढी विद्यार्थी रहेको उनको भनाइ छ।
चैत १९ देखि २९ गतेसम्म भएको एसइई परीक्षा भएको थियो। उक्त परिक्षाको नतिजा र उत्तरपुस्तिका वैशाख ५ गतेभित्र बुझाउन राष्ट्रिय परीक्षा बोर्डले निर्देशन दिएको थियो।
जिल्ला शिक्षा विकास तथा समन्वय इकाई भक्तपुरका प्रमुख कमला ज्ञवालीका अनुसार चैत ३० नै सबै विषयको नतिजा र उत्तरपुस्तिका परीक्षा बोर्डमा बुझाइएको थियो।
'हामीले चैत २७ गते नै परीक्षा केन्द्रको नतिजा र उत्तरपुस्तिका परीक्षा बोर्डमा बुझाएका हौं,' उनले सेतोपाटीसँग भनिन्, 'हामीले आफ्नो जिम्मेवारी समयअगावै पूरा गरेका छौं।'
भक्तपुरमा २४ वटा परीक्षा केन्द्र थिए। तीमध्ये एउटा कारागार केन्द्रमा विद्यार्थी नभएकाले २३ वटा केन्द्रमा मात्र परीक्षा सञ्चालन भएको थियो। ती केन्द्रमा ६ हजार ६७ विद्यार्थी सहभागी भएकामा एक–दुई जनाले परीक्षा नदिएको हुनसक्ने उनले बताइन्।
ललितपुरले पनि वैशाख २ गते सबै विषयको नतिजा र उत्तरपुस्तिका परीक्षा बोर्डमा बुझाइसकेको जानकारी दिए।
जिल्ला शिक्षा विकास तथा समन्वय इकाई ललितपुरका प्रमुख प्रकाश सापकोटाका अनुसार जिल्लाभित्र ४० वटा परीक्षा केन्द्रमा करिब १० हजार ५ सय विद्यार्थीले परीक्षा दिएका छन्।
'परीक्षा केन्द्रहरूले चैत ३० गते साँझसम्म सबै नतिजा र उत्तरपुस्तिका बुझाएका थिए,' उनले भने, 'सोही दिन बुझाउन ढिला भएकाले बैशाख २ गते परीक्षा बोर्डमा बुझाएका हौं।'
सरकारले परीक्षा सकिएको एक महिनाभित्र नतिजा सार्वजनिक गर्ने निर्णय गरेकाले तोकिएको समयमै काम सम्पन्न गर्न कुनै कठिनाइ नभएको उनले बताए।
काठमाडौं उपत्यकाका तीनै जिल्लाले कापी जाँच सके पनि सबै जिल्लाको सकिएको छैन।
राष्ट्रिय परीक्षा बोर्ड, परीक्षा नियन्त्रणको सुचना अधिकारी लक्ष्मी मरासिनीका अनुसार शुक्रबार साढे ३ बजेसम्म सबै जिल्ला शिक्षा विकास तथा समन्वयन इकाईहरूबाट नतिजा र उत्तरपुस्तिका आइपुगेको छैन।
'कतिपयले जुन-जुन विषयको उत्तरपुस्तिका जाँच भइरहेको छ त्यसको नतिजा पठाइरहेका छन्, त्यसैले कतिले पठाए, कति बाँकी छन् भनेर हेर्न बाँकी छ,' उनले भनिन्, 'भोलिसम्म पठाउने मिति छ। भोलि साँझ भन्नसक्छु।'
उनका अनुसार अहिले पनि विभिन्न जिल्लाबाट नतिजा र उत्तरपुस्तिका बुझाउने काम भइरहेको छ। परीक्षा बोर्डले सक्रिय भएर काम गरिरहेको छ।
बोर्डको कार्यसमितिले वैशाखको अन्तिमसाता एसईइको नतिजा प्रकाशित गर्ने तयारी गरेको छ। सोही तयारी अनुसार काम भइरहेको उनले बताइन्।
'वैशाखको अन्तिम साता नतिजा सार्वजनिक गर्ने सोचेरै तीव्र गतिमा काम भइरहेको छ,' उनले भनिन्, 'कुनै पनि प्राविधिक समस्या आएन भने तोकिएकै समयमा सार्वजनिक गर्न सकिन्छ।'
-ink-1742438135.jpeg)
-1756794700.JPG)
-1746009348.jpg)
