गोरखाको चुमनुब्री गाउँपालिका वडा नम्बर ६ चुम्चेतस्थित सर्दीमा बनाइएको अस्थायी पुल बाढीले बगाएको छ।
अविरल वर्षापछि बूढीगण्डकीको सहायक स्यारखोलामा आएको बाढीले ४ वटै काठका पुल बगाएको हो।
वडा सदस्य ठिले ग्याम्जो लामाका अनुसार कात्तिक १३ र १४ गते स्यार खोलामा आएको बाढीले काठका पुल बगाएको हो।
असोज २५ को बाढीले यहाँको क्यान्टिलिभर पुल नै बगाएको थियो। त्यसपछि चुमनुब्री गाउँपालिका ६ चुम्चेत र ७ छेकम्पार आउजाउ गर्ने बाटो बन्द भएको थियो।
स्थानीय बासिन्दाहरूले १५ दिन लगाएर काठका ४ वटा पुल राखेपछि मानिस र खच्चड हिँडडुल गर्न सहज भएको थियो। तर काठका अस्थायी पुल बगेपछि फेरि चुमभ्याली आउजाउ गर्ने बाटो बन्द हुन पुगेको छ।
चुमनुब्री गाउँपालिका अध्यक्ष निमा लामाले सर्दीभिरमा स्थानीय सरकारले तत्कालका लागि बाटो बनाउने भए पनि दीरंघकालीन रूपमा यहाँ बाटो बनाउन संघीय सरकारकै सहयोग आवश्यक पर्ने बताए।
उनकाअनुसार पहरा फुटाएर बाटो बनाउने वा क्यान्टिलिभर पुल मर्मत गर्नुपर्ने अवस्था छ।
