वुमेन्स च्याम्पियन्स लिग (डब्लूसिएल) टी–२० क्रिकेट प्रतियोगितामा विराटनगर टाइटन्सले विजयी सुरुवात गरेको छ।
विराटनगरले बिहीबार भएको खेलमा ललितपुर फाल्कोन्सलाई ४ विकेटले हरायो।
टस हारेर पहिले ब्याटिङ गरेको ललितपुरले २० ओभरमा ७ विकेटको क्षतिमा १२२ रन जोड्यो। ललितपुरका लागि ममता चौधरीले रनआउट हुनुअघि २४ बलमा २८ रन जोडिन्। करुणा भण्डारीले २१ रन जोड्दा कृती सेन र सम्झना खड्काले नटआउट १३–१३ रन जोडे।
बलिङमा विराटनगरकी सबनम राई र आरती बिडारीले १–१ विकेट लिए।
१२३ रनको लक्ष्य विराटनगरले १६ ओभरमा ६ विकेटको क्षतिमा पूरा गर्यो। विराटनगरका लागि ज्योती पाण्डेले ४३ बलमा ६५ रन जोडिन्। उनले १० चौका र १ छक्का हिर्काइन्। उनकी ओपनिङ पार्टनर सोनु खड्काले २४ रनको योगदान दिइन्।
अस्मिना कर्माचार्यले नटआउट १२ रन जोडिन्।
बलिङमा ललितपुरकी सम्झना खड्काले २ विकेट हात पारिन्।