पाकिस्तान क्रिकेट बोर्डका अध्यक्ष मोहसिन नाक्वीले अन्तिम समयमा पाकिस्तान सुपर लिग (पीएसएल) छाडेर इन्डियन प्रिमियर लिग (आईपीएल) रोज्ने खेलाडीहरूमाथि कानुनी कारबाही गर्ने चेतावनी दिएका छन्।
यसपटक लगातार दोस्रो वर्ष पीएसएल र आईपीएलको समय एकैसाथ परेको छ। श्रीलंकाका दासुन शनाकाले अन्तिम समयमा लाहोर कलन्दर्स छाडेर आईपीएलको राजस्थान रोयल्स रोजेका थिए। त्यस्तै, जिम्बावेका तीव्र गतिका बलर ब्लेसिङ मुजाराबानीले पनि कोलकता नाइट राइडर्ससँग सम्झौता भएपछि पीएसएलबाट नाम फिर्ता लिएका छन्।
अध्यक्ष नाक्वीले नियम अनुसार त्यस्ता खेलाडीहरूलाई कारबाही गरिने बताएका छन्। गत वर्ष पनि यसैगरी अन्तिम समयमा आईपीएल रोज्ने खेलाडी कोर्बिन बोशलाई पीएसएलले एक वर्षको प्रतिबन्ध लगाएको थियो। यसपटक पनि सोही प्रकृतिको कारबाही हुने संकेत दिइएको छ।
आईपीएलसँग समय जुध्नु ठूलो समस्या नभएको तर वर्षभरि अरू समय खाली नभएकाले पीएसएल सार्न नसकिएको नाक्वीले स्पष्ट पारेका छन्। केही खेलाडी बाहिरिए पनि अन्य उत्कृष्ट खेलाडीहरू पाकिस्तान आइरहेको उनले दाबी गरे।
पश्चिम एसियाको द्वन्द्व र त्यसले निम्त्याएको तेल संकटका कारण यस वर्षको पीएसएल 'बन्द रंगशाला' (दर्शकविना) खेलिने भएको छ। यसअघि ६ वटा सहरमा खेल हुने भनिए पनि अब लाहोर र कराँची गरी दुईवटा सहरमा मात्र खेलहरू आयोजना गरिनेछ।
शनाका र मुजाराबानी बाहेक गुडाकेश मोटी, जेक फ्रेजर-मगुर्क र स्पेन्सर जोन्सन जस्ता खेलाडीले पनि व्यक्तिगत कारण देखाउँदै पीएसएलबाट नाम फिर्ता लिएका छन्।
पीएसएल मार्च २६ बाट सुरु हुँदैछ भने त्यसको दुई दिनपछि भारतमा आईपीएल सुरु हुनेछ।
-1746009348.jpg)
