धनगढीमा लिटल फ्लावर प्रिमियर लिगको आठौं संस्करण मंसिर ९ गतेदेखि हुने भएको छ।
लिटल फ्लावर स्पोर्टस क्लब धनगढीको आयोजनामा सञ्चालन हुन गइरहेको खुला (सिनियर) टी–२० उक्त क्रिकेट प्रतियोगिता मंसिर ९ गतेदेखि २३ गतेसम्म सञ्चालन हुने क्लबका अध्यक्ष रामचन्द्र शाहीले जानकारी दिए।
सो प्रतियोगिता धनगढीस्थित फाप्ला क्रिकेट मैदानमा संचालन हुनेछ।
प्रतियोगिताको विजेताले नगद दुई लाख पचपन्न हजार पाँच सय पचपन्न तथा उपविजेताले एक लाख २८ हजार नगद तथा ट्रफी, मेडल र प्रमाणपत्र प्राप्त गर्ने छन्।
यस्तै, प्रतियोगितामा सर्वोत्कृष्ट खेलाडीले नगद १५ हजार, उत्कृष्ट बलरले नगद ७ हजार पाँच सय, उत्कृष्ट ब्याटरले नगद ७ हजार पाँच सय प्राप्त गर्ने आयोजकले जनाएको छ।
खेलको प्लेयर अफ द म्याचले नगद १ हजार पाँच सय र प्रतियोगिताको उदीयमान खेलाडीले ५ हजार नगद पुरस्कारका साथै ट्रफी, मेडल र प्रमाणपत्र प्राप्त गर्ने छन्।
प्रतियोगितामा १६ वटा टिमले सहभागिता जनाउने छन्। प्रतियोगिताको आयोजक लिटल फ्लावर स्पोर्टस क्लब रहेको छ भने प्रवर्द्धकमा धनगढी उपमहानगरपालिका रहेको छ।
