नेपाल प्रिमियर लिग (एनपिएल) मा चार खेल खेलेर स्वदेश फर्कन लागेका वेस्ट इन्डिजका ब्याटर शेरफेन रदरफोर्डले नेपाल, नेपाली क्रिकेट र सुदूरपश्चिम रोयल्सका समर्थकको खुलेर प्रशंसा गरेका छन्।
सोमबार चितवन राइनोजलाई ५ विकेटले पराजित गरेपछि दिएको अन्तर्वार्तामा रदरफोर्डले नेपाली समर्थकको क्रिकेटप्रतिको लगाव र टोलीलाई दिइरहेको मायाबाट आफू निकै प्रभावित भएको बताए। उनले सुदूरपश्चिमका समर्थकलाई 'ब्रिलियन्ट' अर्थात् अद्भुत भनेका छन्।
नेपाल आउँदा सुदूरपश्चिमको यति ठूलो समर्थक समूह होला भन्ने आफूले अपेक्षा नगरेको उनले बताए। टोलीमा आबद्ध भएपछि आफ्नो सामाजिक सञ्जालमा समेत समर्थकको प्रतिक्रिया र फलोअर्स बढेको अनुभव उनले सुनाए।
उनका अनुसार समर्थकहरू ठूलो संख्यामा मैदानमा उपस्थित भएर टोलीलाई समर्थन गर्छन्। खेल राम्रो भइरहेको बेला मात्र होइन, वर्षाका कारण खेल प्रभावित हुँदा पनि उनीहरू मैदानमा आएर साथ दिन्छन्। समर्थकहरूको यही समर्पणले आफूलाई विशेष प्रभावित बनाएको रदरफोर्डले बताए।
'उनीहरूले हामीलाई निरन्तर साथ दिइरहेका छन्। हामी उनीहरूका लागि प्रतियोगिताको उपाधि जित्न चाहन्छौँ,' उनले समर्थकप्रति आभार व्यक्त गर्दै भने।
नेपालको प्राकृतिक सुन्दरता र यहाँका मानिसहरूको व्यवहारले पनि रदरफोर्डलाई प्रभावित पारेको छ। नेपाल आएपछि उनले आफ्नो परिवारसँग कुरा गर्दै नेपाल निकै सुन्दर देश भएको र यहाँका मानिसहरू विशेष रहेको बताएका थिए।
नेपाली क्रिकेटको भविष्यप्रति पनि उनी आशावादी छन्। नेपालमा क्रिकेटको ठूलो सम्भावना रहेको र यहाँ प्रतिभाशाली खेलाडीहरू भएको उनको बुझाइ छ। उनले क्यानडा र यूएईमा नेपाली खेलाडीहरूसँग खेलिसकेको अनुभव पनि सुनाए। वेस्ट इन्डिज र नेपालबीच क्रिकेटका माध्यमबाट राम्रो सम्बन्ध रहेको उनको धारणा छ।
नेपाली टोलीको कप्तानी गरिरहेका दीपेन्द्रसिंह ऐरीको पनि उनले प्रशंसा गरे। दीपेन्द्रलाई निडर क्रिकेट खेल्ने खेलाडीका रूपमा चित्रण गर्दै उनले विश्वकपदेखिकै प्रदर्शनबाट अन्य खेलाडीले सिक्न सक्ने बताए।
उनले दीपेन्द्रलाई निकै बुद्धिमान, विनम्र र सहज रूपमा घुलमिल हुन सक्ने व्यक्तिका रूपमा वर्णन गरे। मैदानमा उनको सकारात्मक ऊर्जा र नेतृत्व क्षमता पनि रदरफोर्डलाई मन परेको छ। अन्तर्राष्ट्रिय स्तरमा दीपेन्द्रले थप अवसर पाइरहेको देख्दा आफू खुसी भएको उनले बताए।
वर्षाले प्रभावित खेलमा खेल्न चाहेका थिएनन्
रदरफोर्डको नेपाल बसाइको एउटा रोचक प्रसंग अघिल्लो खेलसँग पनि जोडिएको छ। शनिबार वर्षाका कारण प्रभावित सुदूरपश्चिम र विराटनगर किंग्सबीचको खेलमा उनी मैदान उत्रन इच्छुक थिएनन्। तर, व्यवस्थापकको आग्रहपछि टोलीको हितका लागि खेल्न तयार भएको उनले अन्तर्वार्तामा बताएका छन्।
शनिबारको खेल वर्षाका कारण लामो समय प्रभावित भएको थियो। त्रिवि मैदानको आउटफिल्ड भिजेका कारण खेल पाँच ओभरमा झारिएको थियो। तर, मैदानको अवस्था र खेलाडीको सुरक्षालाई लिएर सुदूरपश्चिमले असहमति जनाएपछि खेल सुरु हुन ढिलाइ भएको थियो।
सुदूरपश्चिमका विदेशी खेलाडी खेल्न तयार नभएको विषयमा क्यान सचिव पारस खड्काले समेत सार्वजनिक रूपमा बोलेका थिए। खेल रेफ्री र अम्पायरले मैदान खेल्न योग्य ठहर गरेपछि खेल्नुपर्ने अवस्था बनेको उनको भनाइ थियो। अन्ततः राति करिब ९ः१५ बजे पाँच ओभरको खेल सुरु भएको थियो। उक्त खेलमा विराटनगरले सुदूरपश्चिमलाई ३५ रनले पराजित गरेको थियो।
जितसँगै बिदा हुँदै रदरफोर्ड
नेपालबाट फर्कनुअघि रदरफोर्डले सुदूरपश्चिमलाई जित दिलाउन महत्वपूर्ण योगदान दिए। सोमबार चितवनले दिएको १३० रनको लक्ष्य पछ्याउने क्रममा उनले १५ बलमा अविजित २१ रन बनाए। उनको इनिङ्समा २ चौका र १ छक्का सामेल थियो।
सुदूरपश्चिमले ७० रनमा चार विकेट गुमाउँदा खेल केही दबाबमा पुगेको थियो। त्यसपछि आरिफ शेखसँग मिलेर उनले छैटौँ विकेटका लागि अविजित २८ रनको साझेदारी गरे। आरिफले पनि २० रन बनाएपछि सुदूरपश्चिमले १६.४ ओभरमै लक्ष्य पूरा गर्यो।
यसअघि ब्राण्डन म्याकमुलनले २१ बलमा ४३ रन बनाउँदै सुदूरपश्चिमको जितको आधार तयार गरेका थिए।
चार खेल खेलेर नेपालबाट फर्कन लागेका रदरफोर्डले अन्तिम खेलमा जितको खुसीसँगै नेपाली समर्थकको माया र सम्मान पनि लिएर जाने भएका छन्।
-1793637209.png)
