आइसिसी पुरुष टी-२० विश्वकप २०२६ को पहिलो खेलमा पाकिस्तानले नेदरल्याण्ड्सलाई रोमाञ्चक खेलमा ३ विकेटले पराजित गरेको छ।
खेलको अन्तिमतिर हारको नजिक पुगेको पाकिस्तानलाई फहीम असरफले विष्फोटक ब्याटिङ गर्दै उद्धार गरे। यो खेल पहिलो खेल भए पनि उद्घटान खेल भने भारत र अमेरिकाबीच शनिबार साँझ मुम्बईमा हुँदैछ।
खेलको सुरुवात निकै आक्रामक रह्यो। पहिलो बलमै चौका प्रहार गर्दै नेदरल्याण्ड्सले आफ्नो मनसाय प्रष्ट पारेको थियो। डच टोलीले सुरुवाती ३ ओभरमै विना विकेट २८ रन बनाएर सानदार सुरुवात गर्यो।
तर, पाकिस्तानले पावरप्लेको अन्तिमतिर पुनरागमन गर्दै दुवै ओपनरलाई आउट गर्यो। ६ ओभरको समाप्तिमा नेदरल्याण्ड्सको स्कोर ५०/२ थियो। माइकल लेभिट (१५ बलमा २४ रन) लाई आउट गर्न बाबर आजम र शाहिन अफ्रिदीले बाउन्ड्रीमा मिलेर लिएको उत्कृष्ट क्याच खेलको मुख्य आकर्षण बन्यो। पाकिस्तानको कसिलो फिल्डिङका कारण नेदरल्याण्ड्सले निर्धारित २० ओभरमा १ बल बाँकी छँदै १४७ रन मात्र बनाउन सक्यो। डच टोलीका लागि कप्तान स्कट एडवर्ड्सले सर्वाधिक ३७ रन बनाए।
१४८ रनको लक्ष्य पछ्याएको पाकिस्तानका लागि सैम अयुब र साहिबजादा फरहानले आक्रामक सुरुवात गरे। अयुबले १३ बलमा २४ रन बनाएर आउट भए पनि फरहानले अर्धशतकको नजिक पुग्दै रन गति बढाए। तर, खेलको बीचतिर डच बलरहरूले कडा टक्कर दिए। पल भान मिकेरेनले एकै ओभरमा दुई विकेट लिए भने रोलोफ भान डर मर्वेले बाबर आजमलाई आउट गरे।
एक समय पाकिस्तानले मात्र १६ रन जोड्दा ५ विकेट गुमाएपछि खेल नेदरल्याण्ड्सको पोल्टामा पुगेको देखिन्थ्यो। अन्तिम २ ओभरमा पाकिस्तानलाई जितका लागि २९ रन आवश्यक थियो, जुन निकै कठिन मानिन्थ्यो।
यस्तो अवस्थामा फहीम असरफले १९औं ओभरमा तीनवटा छक्का प्रहार गर्दै खेलको पासा पल्टाए। अन्तिम ओभरमा ५ रन मात्र चाहिएकोमा असरफले चौका प्रहार गर्दै ३ बल बाँकी छँदै पाकिस्तानलाई जित दिलाए। उत्कृष्ट लडाइँका बाबजुद नेदरल्याण्ड्सले हार बेहोर्नु पर्यो।
-1746009348.jpg)
