आइसिसी टी-२० विश्वकपअन्तर्गत सुपर-८ को खेलमा भारतले जिम्बावेमाथि ७२ रनको जित निकालेको छ।
चेन्नईमा निकालेको यो जितले भारतको सेमिफाइनल सम्भावना जीवित बनेको छ। अब आइतबार भारत र वेस्ट इन्डिजबीच हुने सुपर-८ को खेल निर्णायक र नकआउट जस्तै हुनेछ। जित हात पार्ने टोली सेमिफाइनल पुग्नेछ।
भारतको ऐतिहासिक ब्याटिङ र कीर्तिमानहरू:
• दोस्रो ठूलो स्कोर: भारतले जिम्बावेविरुद्ध चेन्नईमा २५६/४ रन बनायो। यो पुरुष टी-२० विश्वकप इतिहासकै दोस्रो ठूलो स्कोर हो। यसअघि सन् २००७ मा श्रीलंकाले केन्याविरुद्ध २६० रन बनाएको थियो, जुन अहिलेसम्मकै उच्च स्कोर हो।
• आफ्नै कीर्तिमान तोडियो: विश्वकपमा भारतको यसअघिको उच्च स्कोर २१८/४ (सन् २००७ मा इंग्ल्यान्डविरुद्ध) थियो।
• २५०+ रनको वर्षा: टी-२० अन्तर्राष्ट्रियमा भारतले ५ पटक २५० भन्दा बढी रन बनाइसकेको छ। कुनै पनि अन्य देशले ३ पटकभन्दा बढी यस्तो स्कोर गर्न सकेका छैनन्। आइपिएल टोली 'सनराइजर्स हैदरावाद' सँगै भारतले सबै खालका टी-२० खेलमा सबैभन्दा धेरै (५ पटक) २५०+ रन बनाएको कीर्तिमान बराबरी गरेको छ।
• सामूहिक प्रदर्शन: भारतको इनिङ्समा ६ जना ब्याटरले २० भन्दा बढी रन बनाए र सबैको स्ट्राइक रेट १५० भन्दा माथि थियो। यस्तो उपलब्धि क्रिकेट इतिहासमा विरलै (यसअघि जिब्राल्टरले बुल्गेरियाविरुद्ध मात्र) भएको छ।
• अचम्मको स्कोरकार्ड: अभिषेक शर्माको ५५ रन टोलीको उच्च स्कोर थियो। अचम्मको कुरा के छ भने, २५० भन्दा बढी रन बन्दा पनि कसैले ६० रन कटाएनन्। यस्तो दुर्लभ घटना यसअघि सन् २०२१ मा सिपिएलमा जमैका तल्लावाहजको खेलमा मात्र भएको थियो।
जिम्बावेको अवस्था र अन्य रेकर्ड:
• रनको ओइरो: जिम्बावेले आफ्ना पछिल्ला दुई खेलमा कुल ५१० रन खायो। अघिल्लो खेलमा वेस्ट इन्डिजले २५४ रन बनाएको थियो भने यसपालि भारतले २५६ रन बनायो। लगातार दुई खेलमा २५० भन्दा बढी रन खाने जिम्बाब्वे पहिलो टोली बन्यो।
• छक्काको वर्षा: भारतले यो खेलमा १७ वटा छक्का प्रहार गर्यो, जुन विश्वकपमा भारतको सबैभन्दा धेरै हो।
• सिकन्दर राजाको कीर्तिमान: जिम्बावेका सिकन्दर राजा टी-२० अन्तर्राष्ट्रियमा ३००० रन र १०० विकेट लिने विश्वकै दोस्रो खेलाडी बने (मलेसियाका वीरेन्द्र सिंहपछि)। उनी जिम्बाब्वेका लागि ३००० रन पुरा गर्ने पहिलो खेलाडी पनि हुन्।
• खेलको कुल रन: दुवै टोलीले मिलेर चेन्नईमा ४४० रन बनाए। यो विश्वकप इतिहासकै दोस्रो ठूलो 'म्याच एग्रिगेट' (दुवै टोलीको कुल स्कोर) हो। यसअघि सन् २०१६ मा इंग्ल्यान्ड र दक्षिण अफ्रिकाबीचको खेलमा ४५९ रन बनेको थियो।
खेलाडीहरूको व्यक्तिगत उपलब्धि:
• ब्रायन बेनेट: बेनेटले भारतविरुद्ध नटआउट ९७ रन बनाए। यो विश्वकपमा जिम्बाब्वेका लागि कुनै पनि ब्याटरले बनाएको सबैभन्दा ठूलो स्कोर हो। उनले यस विश्वकपमा कुल २७७ रन बनाइसकेका छन्, जुन जिम्बाब्वेका लागि एकै विश्वकपमा सबैभन्दा धेरै रन हो।
• अर्शदीप सिंहको नयाँ उचाइ: अर्शदीप सिंहले टी-२० विश्वकपमा ३५ विकेट पुर्याउँदै भारतका लागि सबैभन्दा धेरै विकेट लिने बलर बनेका छन्। उनले जसप्रित बुमराहको ३३ विकेटको कीर्तिमान तोडेका हुन्।
-1746009348.jpg)
