भारतीय ओपनर अभिषेक शर्माले दिल्लीमा अफगानिस्तानविरुद्धको तेस्रो टी-२० खेलमा मात्र ३० बलमा शतक प्रहार गर्दै पूर्ण सदस्य राष्ट्रका ब्याटरद्वारा बनाइएको सबैभन्दा छिटो टी-२० आई शतकको नयाँ कीर्तिमान कायम गरेका छन्।
यसअघि यो कीर्तिमान संयुक्त रूपमा जिम्बावेका सिकन्दर रजा (२०२४ मा गाम्बियाविरुद्ध) र न्युजिल्यान्डका फिन एलेन (२०२६ टी-२० विश्वकपमा दक्षिण अफ्रिकाविरुद्ध) को नाममा ३३ बलको रहेको थियो, जसलाई अभिषेकले ३ बलले सुधार गरेका हुन्।
यसका साथै उनले भारतका रोहित शर्माले सन् २०१७ मा श्रीलंकाविरुद्ध ३५ बलमा बनाएको राष्ट्रिय कीर्तिमानलाई ५ बलले पछाडि पारेका छन्।
यद्यपि, समग्र टी-२० अन्तर्राष्ट्रिय क्रिकेटमा भने इस्टोनियाका साहिल चौहानले सन् २०२४ मा साइप्रसविरुद्ध बनाएको २७ बलको शतक नै अहिलेसम्मकै सबैभन्दा छिटो शतकको रूपमा दर्ता छ।
यो अभिषेकको तेस्रो टी-२० आई शतक हो। भारतका लागि रोहित शर्मा (५ शतक) र सूर्यकुमार यादव (४ शतक) ले मात्र उनीभन्दा बढी शतक प्रहार गरेका छन्।
अभिषेकले आफ्नो पहिलो ५० रन मात्र १६ बलमा पूरा गरेका थिए भने अर्धशतक बनाएपछि अफगानिस्तानलाई कुनै मौका नदिई थप १४ बलमै शतक पूरा गरे। उनी भारतीय इनिङ्सको १० औँ ओभरमा आउट हुनुअघि ३४ बलमा १०८ रनको विष्फोटक इनिङ्स खेले। यस क्रममा उनले ९ चौका र ११ छक्का प्रहार गरेका थिए।
उनी आउट हुँदा भारतको स्कोर १४२ रनमा १ विकेट रहेको थियो, जसमा अभिषेक एक्लैले टोलीको कुल रनको ७६ प्रतिशतभन्दा बढी योगदान दिएका थिए। सो साझेदारीमा उनका ओपनिङ पार्टनर सन्जु सामसनले २५ बलमा ३४ रन जोडेका थिए। यससँगै भारतले २२१ रन जोड्यो। भारतले यसअघिका दुवै खेल जितेर सिरिज कब्जा गरिसकेको छ।
यस खेलअघि अभिषेक आईसीसी टी-२० आई ब्याटिङ वरीयतामा दोस्रो स्थानमा उक्लिएका थिए, जहाँ उनका टोलीका साथी ईशान किशान मात्र उनीभन्दा अगाडि छन्।
-1746009348.jpg)
