कोरोनाभाइरसका कारण फुटबल गतिविधि ठप्प भएपछि 'अनइम्प्लोइमेन्ट सेटलमेन्ट' (तलब कटौती) सम्झौता गर्न नमान्ने ९ खेलाडीलाई स्विस क्लब एएफ सिओनले बर्खास्त गरेको छ।
क्लबले आफ्नो पूरै टिमलाई ह्वाट्सएपमार्फत 'अनइम्प्लोइमेन्ट सेटलमेन्ट' गर्नका लागि सन्देश पठाएको थियो। सिओन स्विट्जरल्यान्डको पहिलो डिभिजनको लिग खेल्ने क्लब हो।
क्लबका अध्यक्ष क्रिस्टियन कस्टान्टिनले 'टेक्निकल अनइम्प्लोइमेन्ट' का लागि खेलाडीहरूलाई सन्देश पठाएका थिए। अध्यक्षले खेलाडीलाई ९ हजार ६ सय स्विस फ्रान्क मासिक तलब लिन प्रस्ताव गरेका थिए। जुन रकम स्विट्जरल्यान्डको कानुनअनुसार मासिक तलबको ८० प्रतिशत हो।
खेलाडीहरुलाई सम्झौतामा कुरा गर्नका लागि बुधबार दिउँसो सम्मको समय दिइएको थियो। अन्तिम समयसम्म टिमका कति खेलाडीले कुनै प्रतिक्रिया दिएनन् भने कतिपयले विरोध गरे। प्रतिक्रिया नदिने र विरोध गर्ने ९ खेलाडीलाई क्लबले बर्खास्त गर्ने निर्णय गर्यो। बर्खास्तगीमा परेका कतिपय खेलाडीको सम्झौता जुनसम्म रहेको थियो।
बर्खस्तगीमा परेका खेलाडीमा इंग्लिस क्लब आर्सनलका पूर्व खेलाडीद्वय जोहान डिजोउरा र एलेक्जेन्द्रे सङसहित, क्रिस्टियन जोक, पाजटिम कसामी, इमिर लेन्जानी, जेभियर कोउसासी, विरामा एनडोए, मिकेल फाचिनेटी र सेडेउ डोउबिया छन्।
बर्खास्तगीको स्विस खेलाडी युनियनले विरोध गरेको छ। युनियनले क्लबको निर्णय अन्यायपूर्ण भएको बताएको छ। बर्खास्तविरुद्ध कानुनी प्रक्रियामा जान युनियनले सुझाव दिएको छ।
यता जर्मन क्लब बोरुसिया मोन्चेनङग्लाबाचले तलबको केहि प्रतिशत कटौती गर्ने निर्णय खेलाडीले स्वीकार गरेका छन्।
फ्रेन्च क्लब अमिनेइन्सले पनि तलबको केहि प्रतिशत कटौती गर्नका लागि आफ्ना खेलाडीसँग अनुमति मागेको छ।
