गत मे महिनामा जब लिभरपुल ब्राइटनको मैदानमा आएको थियो, हारका बाबजुद पनि समर्थकहरू खुसी मनाइरहेका थिए। त्यतिबेला अर्ने स्लटको टोलीले प्रिमियर लिगको उपाधि जितिसकेको थियो र त्यो खेल उनीहरूका लागि एउटा उत्सव जस्तै थियो।
तर १० महिनापछि समय बदलिएको छ। लिभरपुल फेरि ब्राइटनसँग पराजित भयो, तर यसपालि खेल सकिनुअघि नै निराश समर्थकहरू रंगशालाबाट बाहिरिसकेका थिए।
यो सिजन प्रिमियर लिगमा लिभरपुलको यो १०औँ हार हो। अघिल्लो सिजनको विजेता टोलीले आफ्नो उपाधि रक्षा गर्ने क्रममा १० वा सोभन्दा बढी खेल हारेको यो इतिहासमा सातौँ पटक मात्र हो। सिजनको सुरुमा लगातार ५ खेल जितेको लिभरपुलले त्यसपछिका २६ खेलमा मात्र ९ वटा जित निकालेको छ। यो कमजोर लयका कारण लिभरपुल अर्को वर्षको च्याम्पियन लिगका लागि छनोट हुनेमा शंका उब्जिएको छ।
अहिले लिभरपुल अंक तालिकाको पाँचौँ स्थानमा छ। च्याम्पियन लिगमा पुग्न यो स्थान सुरक्षित मानिए पनि उनीहरूको पछिल्लो प्रदर्शनले ढुक्क हुने अवस्था छैन।
टोलीका मुख्य खेलाडीहरू एलिसन र मोहम्मद सलाह चोटका कारण मैदान बाहिर छन् भने स्ट्राइकर ह्युगो एकिटिके पनि खेलको सुरुमै घाइते भएर बाहिरिए। प्रशिक्षक अर्ने स्लटले हारको मुख्य कारण थकान र खेलाडीहरूको चोटलाई मानेका छन्। उनले भने, ‘हामीले महत्वपूर्ण खेलाडीहरू गुमायौँ र दोस्रो हाफमा ब्राइटन हामीभन्दा धेरै राम्रो खेल्यो। उनीहरू जितको हकदार थिए।’
लिभरपुलले यो सिजन ४५० मिलियन पाउन्ड खर्च गरे पनि टोलीमा गहिराइ नदेखिएको भन्दै आलोचना भइरहेको छ। स्लट आफैँले पनि अहिलेको प्रदर्शन क्लबको साख अनुसार नभएको स्वीकार गरेका छन्। पूर्व गोलकिपर रब ग्रीनका अनुसार यो लिभरपुलका लागि निकै ठुलो गिरावट हो। उनले भने, ‘यो टोलीबाट के आशा गर्ने भन्ने नै अन्योल छ। टोलीको जग नै हल्लिएको जस्तो देखिन्छ।’
लिभरपुलले पछिल्ला तीन खेलमा मात्र १ अंक जोडेको छ। अबको दुई हप्ता अन्तर्राष्ट्रिय खेलहरूको विश्राम छ, त्यसपछि लिभरपुलले म्यानचेस्टर सिटीसँग एफए कप र पीएसजीसँग च्याम्पियन लिग खेल्नुपर्नेछ।
पूर्व खेलाडी स्टिफन वार्नकले कडा चेतावनी दिँदै भनेका छन्, ‘यदि उनीहरूले पेरिसमा पीएसजी विरुद्ध यस्तै खेले भने नतिजा १०-० हुन सक्छ। ब्राइटनले धेरै मौका गुमायो, तर पीएसजीका खेलाडीहरूले त्यस्तो गल्ती गर्ने छैनन्।’
२०१५-१६ पछि लिभरपुलले एकै सिजनमा यति धेरै खेल हारेको यो पहिलो पटक हो। प्रशिक्षक स्लटले अब बहाना बनाएर नहुने र छिट्टै समाधान खोज्नुपर्ने बताएका छन्। यदि उनले टोलीलाई लयमा फर्काउन सकेनन् भने उनको भविष्य नै संकटमा पर्न सक्छ।
-1746009348.jpg)
