नेपालले सन् २००७ को एएफसी एसियन कप च्याम्पियन इराकसँग मैत्रीपूर्ण खेल खेल्ने भएको छ। विश्वकप तथा एसियन कपको छनोटको तयारीका क्रममा मैत्रीपूर्ण खेल हुन लागेको हो।
इराक फुटबल एसोसिएसनले आफ्नो फेसबुक पेजमा इराकले नेपाल र ताजकिस्तानसँग मैत्रीपूर्ण खेल खेल्ने जानकारी दिएको छ।
इराक फुटबल एसोसिएसनका अनुसार नेपालसँग आगामी मे २९ (जेठ १५) मा मैत्रीपूर्ण खेल हुनेछ। खेल इराकको बश्रा रंगशालामा हुनेछ।
त्यसअघि इराकले ताजकिस्तानसँग २४ मेमा प्रतिस्पर्धा गर्नेछ। नेपाल र ताजकिस्तानसँग खेलेपछि इराकी टिम विश्वकप छनोटका लागि बहराइन जानेछ। इराक विश्वकप छनोटमा समूह 'सी' मा छ।
यसअघि नेपालका प्रशिक्षक अब्दुल्लाह अलमुताइरी विश्वकप छनोटको तयारीका लागि खाडी मुलुक जाने बताएका थिए। विश्वकप छनोटअघि मैत्रीपूर्ण खेलका लागि प्रयास गर्ने उनको भनाइ थियो।
नेपालले फिफा विश्वकप २०२२ तथा एएएफसी एसियन कप २०२३ को दोस्रो चरणमा प्रतिस्पर्धा गरिरहेको छ। समूह 'बी' रहेको नेपाल ३ अंक जोड्दै चौथो स्थानमा छ। समूहमा नेपालभन्दा पछि चाइनिज ताइपेई छ।
समूहको शीर्ष स्थानमा १२ अंक जोडेको अस्ट्रेलिया छ। दोस्रो स्थानको कुवेत र तेस्रो स्थानको जोर्डनको समान १०-१० अंक छ।
छनोटअन्तर्गत नेपालले आगामी जुन पहिलो साता जोर्डन, अस्ट्रेलिया र चाइनिज ताइपेईसँग खेल्न बाँकी छ। समूहका सबै खेल कुवेतमा हुनेछन्।
नेपालले पहिलो खेल ताइपेईसँग ३ जुनमा, दोस्रो खेल जोर्डनसँग ७ जुन र तेस्रो खेल ११ जुनमा अस्ट्रेलियासँग खेल्नेछ।
नेपालले छनोटका लागि आगामी जेठ ३ बाट तयारी सुरु गर्दैछ। तयारीका लागि प्रशिक्षक अब्दुल्लाहले ३२ सदस्यीय प्रारम्भिक टिम घोषणा गरिसकेका छन्।
नेपाली टिम
गोलकिपर : किरणकुमार लिम्बु (कप्तान), विकेश कुथु, दीप कार्की, विशाल सुनार
डिफेन्डर : रन्जित धिमाल, निशान खड्का, रोहित चन्द, अनन्त तामाङ, दिनेश राजवंशी, अजित भण्डारी, छिरिङ गुरुङ, गौतम श्रेष्ठ, विकास खवास
मिडफिल्डर : त्रिदेव गुरुङ, मनिष डाँगी, तेज तामाङ, एरिक विष्ट, सन्जोक राई, विशाल राई, सुनील बल, रवि पासवान, सेसेहाङ आङदेम्बे, सन्तोष तामाङ, विवेक बस्नेत, प्रकास बुढाथोकी, श्यान्सु भुसाल, अन्जन विष्ट, सुमन लामा
फरवार्ड : दर्शन गुरुङ, अभिषेक रिजाल, भरत खवास, नवयुग श्रेष्ठ