इंग्लिस प्रिमियर लिगमा लिभरपुल र म्यानचेस्टर सिटीबीचको खेलपछि भएको घटनामा एक प्रहरी घाइते भएका छन् भने १० जना पक्राउ परेका छन्।
आइतबार लिभरपुलको घरेलु मैदान एनफिल्डमा भएको खेलमा म्यानचेस्टर सिटीले ३–० को जित निकालेको थियो। खेलपछि पक्राउ परेकामध्ये पाँच जनामाथि फुटबलसँग सम्बन्धित विगतका दुःखद घटनाको अपमानजनक ढंगले नारा लगाएको आरोप छ।
मर्सीसाइड प्रहरीले एक व्यक्तिलाई प्रहरी अधिकारीमाथि दुई पटक आक्रमण गरेको आशंकामा पक्राउ गरेको जनाएको छ। छुट्टै घटनामा अर्का प्रहरी अधिकारीको अनुहारमा गम्भीर चोट लागेको थियो। उनलाई उपचारका लागि अस्पताल लगिएको र अहिले घरमै स्वास्थ्यलाभ गरिरहेको प्रहरीले बताएको छ।
अन्य पक्राउ परेकामध्ये एक जनामाथि मादक पदार्थ सेवन गरी होहल्ला गरेको र आक्रमण गरेको, दुई जनामाथि सार्वजनिक उपद्रो मच्चाएको तथा एक जनामाथि मैदानभित्र वस्तु फ्याँकेको आरोप छ।
प्रहरी अधिकारी लियान होबिनले दुःखद घटनामा ज्यान गुमाएकाहरूलाई लक्षित गरी नारा लगाउनु फुटबलमा स्वीकार्य नहुने बताइन्। यस्ता गतिविधिले मृतकका परिवार तथा आफन्तलाई गम्भीर पीडा दिने उनको भनाइ थियो।
विवादित खेल म्यानचेस्टर सिटी प्रिमियर लिगका वित्तीय नियम उल्लंघनसम्बन्धी ११४ आरोपमा दोषी ठहरिएपछि खेलेको पहिलो खेल पनि थियो। खेलअघि एनफिल्डमा सिटीको टोलीले विरोधको सामना गरेको थियो। लिभरपुलका समर्थकले ‘धोकेबाज सिटी’ भन्ने सन्देश भएका स्कार्फ प्रदर्शन गरेका थिए भने सिटीका खेलाडीको नाम घोषणा गर्दा चर्को हुटिङ गरेका थिए।
प्रहरीका अनुसार खेल हेर्न उपस्थित करिब ६० हजार दर्शकमध्ये अधिकांशको व्यवहार राम्रो थियो।
