नेपालका उदयीमान युवा खेलाडी प्रिन्स दाहालले तेश्रो चौतारा साँगाचोकगढी मेयर कप तथा प्रथम तोप –२१ राष्ट्रिय ब्याडमिन्टन प्रतियोगिताको उपाधि जितेका छन्।
पुरुष एकलको शुक्रबार भएको फाइनल खेलमा सिल्क ग्रुपका प्रिन्सले आर्मीका नविन श्रेष्ठलाई २१–१४, २१–१० को सोझो सेटमा पराजित गर्दै उपाधि जितेका हुन्।
प्रिन्सले नगद १ लाख ११ हजार १ सय ११, प्रमाण पत्र र ट्रफी प्राप्त गरे। यस्तै उपविजेता नविनले नगद ५५ हजार, ५ सय, ५५ हात पारे।
सेमिफाइनलमा नेपाल नम्बर एक खेलाडी सेनाका रत्नजित तामाङ्गलाई पराजित गरेका प्रिन्सले आत्मविश्वासका साथ खेल्दै प्रतियोगितालाई आफ्नो पक्षमा पार्न सफल भएका थिए।
'रत्न दाइसँगको जितले मलाई हौसला बढेको छ। म आफ्नो पूरा खेल खेल्छु, विपक्षीलाई कमजोर ठान्न हुँदैन,' प्रिन्सले खेल्नु अघि भनेका थिए।
त्यसैलाई मनन गर्दै खेलेका प्रिन्सले सिनियर खेलाडी नविनलाई खेलमा हावी हुन दिएनन् ।
तृतीय स्थान प्राप्त गरेका सेनाका रत्नजित र रुकेश महर्जनले जनही नगद १० हजार प्राप्त गरे ।
विश्व महामारीको रुपमा रहेको कोरोनाका कारण खेलबाट बञ्चित रहेका राष्ट्रिय खेलाडीहरुका लागि यो निकैनै महत्वपूर्ण प्रतियोगिता समेत रहेको थियो।
प्रतियोगिता आयोजना गरेकोमा राष्ट्रिय खेलाडीहरुले आयोजकलाई धन्यवाद प्रदान गरे।
मंसिर २१ गते देखि संचालित तोप २१ को आयोजना तथा चौतारा साँगाचोकगढी नगरपालिकाको प्रायोजनमा भएको प्रतियोगितामा १६ राष्ट्रिय खेलाडीहरुको सहभागिता रहेको थियो।
