नेपाली राष्ट्रिय फुटबल टिमको बन्द प्रशिक्षणमा बोलाइएका एक खेलाडीलाई कोरोना भाइरसको संक्रमण भएको छ।
अखिल नेपाल फुटबल संघ (एन्फा) ले ३४ जना फुटबलरसहित ५४ जनाको पाटन अस्पतालमा कोरोना भाइरसको पिसिआर टेस्ट गराएकोमा एक जनामा कोरोना भाइरसको संक्रमण देखिएको हो।
पाटन अस्पतालका निर्देशक डाक्टर बिष्णुप्रसाद शर्माका अनुसार कोरोनाको पोजेटिभ आएका फुटबलरको रिपोर्ट इपिडिमियोलोजी तथा रोग नियन्त्रण महाशाखालाई पठाइएको छ।
यसअघि एन्फाले मंगलबार २९ र सोमबार २५ जनाको कोरोना टेस्ट गराएको थियो। सोमबार टेस्ट गराएका सबैको नेगेटिभ नतिजा आउँदा मंगलबार एक जनाको फेरि टेस्ट गरिने एन्फाले जनाएको थियो।
कोरोना लागेका पुष्टि भएकाको सम्पर्कमा आएकालाई निगरानीमा राखिने तयारी गरिएको छ। यस्तै कोरोना लागेका व्यक्तिको स्वास्थ्य जाँच गरेर घरमै आइसोलेसनमा राख्ने वा अस्पताल राख्ने विषयमा रोग नियन्त्रण महाशाखा निर्णय गर्नेछ।
नेपाली खेलकुद क्षेत्रमा कोरोनाको यो तेस्रो केस हो। यसअघि क्रिकेटर पवन दास र स्क्वास प्रशिक्षक हिरा थापालाई कोरोना लागेको पुष्टि भएको थियो।
फिफा विश्वकप २०२२ र एएफसी एसियन कप २०२३ छनोट प्रतियोगिताको तयारी सुरु गर्नुअघि एन्फाले खेलाडी, प्रशिक्षक, अफिसियल र होस्टलका कर्मचारी गरी ५४ जनाको कोरोना भाइरसको परीक्षण गराएको थियो।
जसमा ३४ खेलाडी, ८ अफिसयल र १२ होस्टलका कर्मचारी थिए।
एन्फाले भदौ १ देखि विश्वकप छनोटको तयारी गर्नका लागि फुटबल टिमका खेलाडी र अफिसियलको कोरोनाको परीक्षण गराएको थियो।
यद्यपी फिफाले यो वर्ष विश्वकप छनोट प्रतियोगिताका बाँकी खेल नगर्ने निर्णय गरेसँगै नेपालको तयारी सुरु नै नभइ स्थगित भइसकेको छ।
