सोमबार बालुवाटारमा सत्ता गठबन्धनको बैठक बसेको छ। मंसिर ४ गते भएको संसदीय निर्वाचनपछि पहिलो पटक बसेको पाँच दलीय गठबन्धनको बैठकले मुलुकको आवश्यकता कारण गठबन्धनलाई निरन्तरता दिने निर्णय गरेको छ।
यसबाहेक बालुवाटार बैठकमा के-के विषयमा कुराकानी भयो? नयाँ सरकार अब कसको नेतृत्वमा बन्छ? सत्ता गठबन्धनमा एक वर्ष सरकारको नेतृत्व एकीकृत समाजवादीले गर्न पाउनु पर्ने माग राखेको हो? लगायत विषयमा सेतोपाटीका शिशिर ढकालले नेकपा (एकीकृत समाजवादी) का अध्यक्ष माधवकुमार नेपालसँग संक्षिप्त कुराकानी गरेका छन्।
बालुवाटारमा आज सत्ता गठबन्धनको बैठक थियो। के-के विषयमा छलफल भयो?
सत्ता गठबन्धनको बैठकमा हामीले निर्वाचन परिणामको समीक्षा गरेका छौं। निर्वाचन शान्तिपूर्ण रूपमा सम्पन्न भएको छ। निर्वाचनका सवालमा देखिएका कमी-कमजोरीबारे पनि छलफल गरेका छौं। मुलुकको आवश्यकतालाई ध्यानमा राखेर पाँच दलीय गठबन्धनको सहकार्यलाई निरन्तरता दिने विषयमा सबै जना सहमत भएका छौं।
अबको सरकार कसको नेतृत्वमा बनाउने भन्नेबारे छलफल भयो कि भएन?
अहिले नै कसले नेतृत्व गर्ने भन्नेबारे छलफल नै भएको छैन। गठबन्धनलाई निरन्तरता दिन एकमत भएका छौं।
निर्वाचनअघि कांग्रेस सभापति देउवाले दुई वर्ष, माओवादी अध्यक्ष प्रचण्डले २ वर्ष अनि तपाईंले १ वर्ष सरकारको नेतृत्व गर्ने सहमति गरेको चर्चा छ नि?
अहिले हामी गठबन्धनको पक्षमा बहुमत पुर्याउने विषयमा केन्द्रित छौं। गठबन्धनका शीर्ष नेताले जनमत पार्टी, नागरिक उन्मुक्ति पार्टी र जनता समाजवादी पार्टीका नेताहरूसँग छलफल गरेका छौं। राप्रपा र राष्ट्रिय स्वतन्त्र पार्टीसँग भने छलफल हुनै बाँकी छ। सरकारको नेतृत्व कसले कसरी गर्ने भन्ने विषयमा कुनै छलफल नै भएको छैन।
तपाईंले पनि रेशम चौधरीलाई जेलमै पुगेर भेट्नुभएको थियो, के-कुराकानी भयो?
उहाँसँग सरकारमा सहभागिताको विषयमा छलफल भएको थियो। उहाँसँगको कुराकानीपछि मैले गठबन्धनको बैठकमा रेशम चौधरीलाई रिहा गर्नुपर्छ भनेको छु। नागरिक उन्मुक्ति पार्टीलाई सत्ता गठबन्धनको सरकारमा सहभागी गराउने विषयमा उहाँ सकारात्मक नै हुनुहुन्छ।
तपाईंले १ वर्ष सरकारको नेतृत्व गर्न पाउनु पर्ने माग राख्नुभएको भन्ने चर्चा नि?
यो विषयमा कुनै सहमति वा छलफल नै भएको छैन। मैले कुनै त्यस्तो माग नै गरेको छैन।
अवसर पाउनुभयो भने त नेतृत्व गर्ने होला नि?
परिस्थितिले कतातिर डोहोर्याउँछ हेर्दै जाउँ। अहिले नै भन्ने वा दाबी गर्ने कुरा भएन नि।
सत्ता गठबन्धन छोडेर वामपन्थी दलको सरकार बन्ने सम्भावना छ कि छैन?
कम्युनिष्टहरूको मोर्चा बन्नसक्ला। तर कम्युनिष्ट शक्तिको तत्कालै एकताको सम्भावना अहिलेलाई छैन। संविधान र लोकतन्त्रलाई सुदृढ बनाउनका लागि वर्तमान गठबन्धनलाई नै निरन्तरता दिन हामी एकमत छौं।