नेपाली कांग्रेसका सभापति शेरबहादुर देउवानिकट केही केन्द्रीय सदस्यहरूले आज बेग्लै भेला गरेर विशेष महाधिवेशन माग गर्ने प्रतिनिधिहरूको मतको सम्मान हुनुपर्ने बताउँदै अपिल जारी गरेका छन्।
राजेन्द्र केसी, भरतकुमार शाह, अर्जुनप्रसाद जोशी, पुष्पा भुसाल, कर्णबहादुर बुढा, गणेश लामा, आङगेलु शेर्पा, डिला संग्रौला, उदयशम्शेर राणा, नानु बास्तोला, धना खतिवडा, अब्दुल रज्जाक, देवेन्द्रराज कँडेल, योगेन्द्र चौधरी, गोपाल दहित, बहादुर सिंह लामा, दिलमान पाख्रिन, अब्दुल सत्तार, मोहन आचार्य, अमृत अर्याल, जिपछिरिङ लामा, रामजनम चौधरी, चम्पादेवी खड्का, नारायणबहादुर कार्की, चीनकाजी श्रेष्ठलगायत ३० केन्द्रीय सदस्यले बेग्लै भेला गरी विशेष महाधिवेशन माग गर्नेहरूको मतको सम्मान हुनुपर्ने धारणा सार्वजनिक गरेका हुन्।
आफूहरूले बैठक गरेर अपिल जारी गरेको केन्द्रीय सदस्य डिला संग्रौला पन्तले सेतोपाटीलाई जानकारी दिइन्।
‘यस परिवेशमा नेपाली कांग्रेसका महाधिवेशन प्रतिनिधिहरूले विशेष महाधिवेशनको माग गरी लिखित निवेदन दर्ता गरिसकेको अवस्था छ। अतः माग गर्ने प्रतिनिधिहरूको मतको सम्मान गर्दै आगामी निर्वाचनलाई मध्यनजर गरी नयाँ ऊर्जा र सोचका साथ निर्वाचनमा होमिन संवाद र सहमति गरी बृहत् एकताबद्ध भइ कांग्रेसको पक्षमा परिणाममुखी वातावरण निर्माण गर्न नेतृत्व तहलाई हार्दिक अपिल गर्दछौं,’ अपिलमा भनिएको छ।
देउवानिकट ३० केन्द्रीय सदस्य चुनावअघि महाधिवेशनका पक्षमा उभिएका थिए। देउवानिकट बाँकी केन्द्रीय सदस्य भने आजै नयाँ बानेश्वरमा छलफलमा छन्।
नेपाली कांग्रेसभित्र विशेष महाधिवेशनलाई लिएर विवाद भइरहेको छ।
यस्तो छ अपिल;
यही आउँदो २०८२ फागुन २१ गते हुन गइरहेको प्रतिनिधि सभाको निर्वाचनलाई मध्यनजर राखी नेपाली कांग्रेसलाई उक्त निर्वाचनमा जनताको विश्वसनिय र थप भरोसा योग्य पार्टी बनाउन जरूरी छ।
परिवर्तन र रूपान्तरणका मुद्दालाई अंगाल्दै नयाँ सोच र दृष्टिकोणका साथ निर्वाचनमा जानुपर्नेछ। यस परिवेशमा नेपाली कांग्रेसका महाधिवेशन प्रतिनिधिहरूले विशेष महाधिवेशनको माग गरी लिखित निवेदन दर्ता गरिसकेको अवस्था छ।
अतः माग गर्ने प्रतिनिधिहरूको मतको सम्मान गर्दै आगामी निर्वाचनलाई मध्यनजर गरी नयाँ ऊर्जा र सोचका साथ निर्वाचनमा होमिन संवाद र सहमति गरी बृहत् एकताबद्ध भइ कांग्रेसको पक्षमा परिणाममुखी वातावरण निर्माण गर्न नेतृत्व तहलाई हार्दिक अपिल गर्दछौं।
-1746009348.jpg)
