नवप्रवेशी सातदोबाटो युथ क्लब सहिद स्मारक ए डिभिजन लिगको शीर्ष स्थानमा उक्लिएको छ।
शुक्रबार साँझ दशरथ रंगशालामा भएको खेलमा सशस्त्र प्रहरी बलको एपिएफ क्लबलाई ४-१ गोलले पराजित गर्दै सातदोबाटो शीर्ष स्थानमा उक्लिएको छ।
सातदोबाटोले ३ खेलबाट ७ अंक जोडेको छ। पहिलो खेलमा फ्रेण्ड्ससँग बराबरी खेलेको सातदोबाटोले दोस्रो खेलमा दाबेदार थ्रीस्टारलाई पराजित गरेको थियो।
शुक्रबार सातदोबाटोको जितमा अजयी मार्टिन्सले ह्याट्रिक गरे। जारी लिगमा उनी ह्याट्रिक गर्ने पहिलो खेलाडी भए।
उनले खेलको ४२ मिनेटमा पहिलो गोल गरेका थिए। पहिलो हाफको इन्जुरी टाइममा मार्टिन्सले टिमका लागि तथा व्यक्तिगत दोस्रो गोल गर्न सफल भए। ५८ मिनेटमा उनले ह्याट्रिक पूरा गर्दा खेल ४-१ को अवस्थामा थियो।
त्यसअघि सातदोबाटोका सुशील राईले टिमका लागि तेस्रो गोल गरेका थिए। एपिएफका बिकी तामाङले ४९ मिनेटमा गरेको गोल सान्त्वनामै सीमित बन्यो।
जारी लिगमा एपिएफको यो लगातार तेस्रो हार हो। अंक तालिकाको पुछारमा रहेको एपिएफ यसअघि पहिलो खेलमा ब्रिगेड ब्वाइजसँग ३-२ र दोस्रो खेलमा च्यासल युथ क्लबसँग १-० गोलले पराजित भएको थियो।