ग्रेट वाल मोटर (जिडब्ल्युएम) नेपालको पोखरास्थित आधिकारिक डिलर रेज मोटर्स प्रालिले उत्तमचोकमा नयाँ सोरूम सञ्चालनमा ल्याएको छ।
सोरूम उद्घाटनसँगै कम्पनीले जिडब्ल्युएमको ओरा ५ र हाभल जोलियन म्याक्स इभी पनि पोखरा बजारमा सार्वजनिक गरेको छ।
नयाँ सोरूम उद्घाटन कार्यक्रममा कम्पनीका अधिकारी, स्थानीय प्रतिनिधि, अटोमोबाइल क्षेत्रका व्यवसायी तथा सञ्चारकर्मीको सहभागिता थियो।
ओरा ५ मा ५८.३ किलोवाट आवरको ब्याट्री र डब्लुएलटिपीअनुसार ४३५ किलोमिटरसम्मको रेन्ज रहेको कम्पनीले जनाएको छ।
यसमा २०० मिलिमिटर ग्राउन्ड क्लियरेन्ससहित विभिन्न सुरक्षा तथा प्रविधियुक्त सुविधा छन्।
त्यस्तै, हाभल जोलियन म्याक्स इभीमा १५० किलोवाटको विद्युतीय मोटर र ५८.३ किलोवाट आवरको ब्याट्री छ।
यसले ४०० किलोमिटरभन्दा बढी रेन्ज दिने कम्पनीको दाबी छ। गाडीमा पानोरामिक सनरुफ, १४.६ इन्चको इन्फोटेनमेन्ट प्रणाली, एडिएएस र भिटुएल सुविधा छन्।
उत्तमचोकस्थित नयाँ सोरूमबाट ग्राहकले बिक्री, सर्भिस र स्पेयर पार्ट्ससहितको ३एस सेवा एकै स्थानबाट पाउनेछन्।
सोरूममा जिडब्ल्युएमका विद्युतीय तथा प्रिमियम गाडीहरू प्रदर्शनीमा राखिने र इभीका लागि आवश्यक प्राविधिक सेवासमेत उपलब्ध गराइने कम्पनीले जनाएको छ।
रेज मोटर्सका अध्यक्ष अशोक चालिसेले पोखरामा जिडब्ल्युएम ब्रान्ड भित्र्याउन पाएकोमा खुसी व्यक्त गर्दै बिक्रीसँगै गुणस्तरीय बिक्रीपछिको सेवा उपलब्ध गराउने बताए।
भिजी इम्पेक्सका महाप्रबन्धक–बिक्री तथा सञ्चालन अधिरकुमार श्रेष्ठले पोखरालाई जिडब्ल्युएमको विस्तारका लागि महत्वपूर्ण बजारका रूपमा लिइएको बताए।
उनका अनुसार नयाँ सोरूममार्फत पोखरा र आसपासका जिल्लाका ग्राहकलाई जिडब्ल्युएमका उत्पादन तथा सेवा सहज रूपमा उपलब्ध हुनेछ।
नयाँ सोरूम सञ्चालनमा आएसँगै ओरा ५ र हाभल जोलियन म्याक्स इभीको बुकिङ तथा टेस्ट ड्राइभ खुला गरिएको कम्पनीले जनाएको छ।
-1746009348.jpg)
