साता कारोबारको अन्तिम दिन सेयर बजार उतारचढावमै रह्यो।
दिनभर क्षणभरमै हरियो र क्षणभरमै रातो भएको परिसूचक अन्त्यमा रातै रहेर बन्द रह्यो। यस दिन १. २९ अंकले बजार घट्यो। सो अंकको गिरावटपछि परिसूचक २९६८ अंकमा कायम भएको छ।
यस दिन साढे ११ बजे परिसूचक न्यूनतम २९४५ अंकसम्म झर्यो। त्यस्तै साढे १ बजे २९८९ अंकसम्म पुगेको थियो।
कुल १० अर्ब ९० करोड रुपैयाँकाे सेयर किनबेच भएको छ। यसअघि हिजो कुल १५ अर्ब ४८ करोड रुपैयाँको सेयर किनबेच भएको थियो।
यस दिन बैंकिङ १०, ब्यापार १४, जलविद्युत २, उत्पादन ११ र माइक्रोफाइनान्स ६४ अंकले घट्यो।
त्यस्तै होटल तथा पर्यटन ३६, विकास बैंक ९४, फाइनान्स ३३, निर्जीवन बीमा ५२, अन्य २६ र जीवन बीमा १५ अंकले बढेको छ।
यस दिन खानीखोल हाइड्रोको मूल्य ६ प्रतिशतले बढ्यो। त्यस्तै नेपाल फाइनान्स, ग्रीन डेभलपमेन्ट बैंक, कर्णाली विकास बैंक र सोल्टी होटलको मूल्य ५ प्रतिशतले बढ्यो।
हिजोसम्म १० प्रतिशतले मूल्य बढेको सिइडिबी हाइड्रोपावरको मूल्य भने यस दिन सबैभन्दा धेरै साढे ६ प्रतिशतले घटेको छ। कम्पनीको मूल्य आजै ८०६ रुपैयाँसम्म पुगेको थियो। एक्कासी बजारमा बिक्रीको चाप परेपछि बन्द हुँदा मूल्य ६८५ रुपैयाँमा झरेको छ। छ्याङ्दी हाइड्रो, ङादी ग्रुपको मूल्य ३ प्रतिशतले घटेको छ।
यस दिन नेपाल पुनर्बीमा कम्पनीको सबैभन्दा धेरै रकम ७७ करोडको कारोबार भएको छ। कम्पनीको मूल्य भने ३ प्रतिशतले बढेको छ। त्यस्तै नेसनल हाइड्रोपावरको ३० करोड तथा नेपाल इन्स्योरेन्स कम्पनीको २७ करोड बराबरको कारोबार भयो।
