बिहीबार नेप्से परिसूचक २७.५६ अंकले बढेर २०६८.२६ बिन्दुमा पुगेर बन्द भएको छ। यस दिन नेप्से परिसूचक १.३५ अंकले बढेको हाे।
नेप्से परिसूचकसँगै बिहीबार कारोबार रकम पनि बढेको छ। बुधबार १ अर्ब ४० करोड ५९ लाख ७४ हजार २५६ रुपैयाँ बराबरको सेयर खरिद–बिक्री भएकोमा आज २ अर्ब ५ करोड ७९ लाख ८० हजार ५७ रुपैयाँ बराबरको सेयर कारोबार भएको छ।
यस दिन २२० वटा धितोपत्र तथा ऋणपत्रको ५१ लाख १ हजार २९० कित्ता सेयर कारोबार भएको छ।
केही दिनदेखि सर्वाधिक काराेबार रिडी पावर कम्पनीको भइरहेको छ। यस दिन उक्त कम्पनीको १० करोड ४३ लाख रुपैयाँ बराबरको सेयर खरिद–बिक्री भएको हो। सो कम्पनीको सेयर मूल्य प्रतिकित्ता ६३२ रुपैयाँ कायम भएको छ।
रैराङ हाइड्रोपावरसँग मर्जरपछिको सञ्चालनमा कम्पनीले करिब ५५ करोड रुपैयाँ नाफा गरेको छ।
छ वटा आयोजना रहेको रिडी पावरले चार आयोजनाबाट आम्दानी भएको छ। कम्पनीको प्रति सेयर आम्दानी ४९ रुपैयाँ रहेको छ।
मर्जरपछि कम्पनीमा ३ कारोड ९२ लाख सेयर प्रिमियम छ। यसबापत कम्पनीले जम्मा ३.५६ प्रतिशत बोनस दिने अवस्था छ।
वित्तीय विवरण राम्रो आएकाले पनि सेयर मूल्य घटेपनि लगानीकर्ताले कम्पनीकाे सेयर किनिरहेका छन्।
सर्वाधिक सेयर खरिद–बिक्री हुने दास्रो कम्पनीमा अपि पावर कम्पनी रहेको छ। उक्त कम्पनीको २७३ रुपैयाँमा ७ करोड ८० लाख रुपैयाँ बराबरको सेयर कारोबार भएको छ।
बिहीबार मन्दाकिनी हाइड्रोपावर र अपर सोलु हाइड्रोको सेयर मूल्य सर्वाधिक १० प्रतिशतले बढेर प्रतिकित्ता मूल्य २८७ रुपैयाँ १० पैसा र ३९२ रुपैयाँ ७० पैसा कायम भएको छ।
त्यस्तै, स्वेत गंगा हाइड्रोपावर र अपर हेवाखोला हाइड्रोपावरको सेयर मूल्य ९.९७ र ९.९६ प्रतिशतले बढेर अन्तिम मूल्य ३२५ रुपैयाँ ४० पैसा र २२६ रुपैयाँ ४० पैसा कायम भएको छ।
यस दिन सेयर मूल्य सर्वाधिक घट्नेमा एनआइबिएल प्रगति फण्ड र सपोर्ट माइक्रोफाइनान्स रहेको छ। एनआइबिएल प्रगति फण्डको इकाइ मूल्य ३.८० र सपोर्ट माइक्रोफाइनान्सको मूल्य ३.२८ प्रतिशतले घटेर प्रतिकित्ता मूल्य क्रमशः ९ रुपैयाँ १२ पैसा र एक हजार ४१५ रुपैयाँमा झरेको छ।
त्यस्तै, आज कारोबारमा आएका १३ वटा समूहगत परिसूचकमध्ये सबै समूहको परिसूचक बढ्दा समग्र नेप्से परिसूचक बढेको हो।
यस दिन विकास बैंक समहको परिसूचक सर्वाधिक ३.१७ प्रतिशतले बढेको छ।
त्यस्तै, वित्त समूहको ३.०१ प्रतिशत, जलविद्युत समूहको परिसूचक २.९८ र अन्य समूहको परिसूचक २.२६ प्रतिशतले बढेको छ।
त्यसैगरी, व्यापार, उत्पादन तथा प्रशोधन, लघुवित्त र लगानी समूहको परिसूचक १ प्रतिशत भन्दा धेरैले बढेको छ।
