लक्ष्मी बैंक र सनराइज बैंक एक आपसमा मर्जर भएर आज (शुक्रबार) देखि एकीकृत कारोबार सुरू भएको छ।
दुवै एक भएपछि लक्ष्मी सनराइज बैंकको नामबाट एकीकृत कारोबार सुरू भएको छ।
दुई बैंकबीच गत जेठ ८ गते मर्जरका लागि अन्तिम सम्झौता भएको थियो।
दुवै बैंकको असार ३ गते सम्पन्न साधारण सभाले मर्जरसम्बन्धी प्रस्ताव पारित गरेका थिए।
यस्तै, नेपाल राष्ट्र बैंकले असार २२ गते र कम्पनी रजिष्ट्रारको कार्यालयले असार २४ गते मर्जरका लागि अन्तिम स्वीकृति प्रदान गरेको थियो।
मर्जरपछि बन्ने बैंकको केन्द्रीय कार्यालय हात्तीसार, काठमाडौंमा रहने बताइएको छ।
दुवै बैंक समान हैसियत अर्थात् १:१ को स्वाप रेसियोमा मर्जरमा गएका हुन्।
यसर्थ लक्ष्मी बैंक वा सनराइज बैंकको १०/१० कित्ता सेयर हुनेको मर्जरपछि बन्ने बैंकको पनि १० कित्ता सेयर नै हुनेछ।
हाल लक्ष्मी बैंकको चुक्ता पुँजी ११ अर्ब ५५ करोड रुपैयाँ र सनराइज बैंकको चुक्ता पुँजी १० अर्ब ११ करोड रुपैयाँ छ। दुई बैंक एक भएपछि चुक्ता पुँजी २१ अर्ब ६६ करोड रुपैयाँभन्दा बढी भएको छ।
-1746009348.jpg)
