नेपालीहरूको सबैभन्दा खर्चिलो चाड हो दसैं। यो चाडमा नयाँ लुगा लगाउनेदेखि मिठा परिकार खाने गरिन्छ। त्यसैले पनि साविकको समयभन्दा यो समय उपभोग बढ्छ।
दसैं खर्चिलो चाड भएकाले खर्च नै धेरै गर्ने हामी नेपालीको बानी पनि छ।
तर खर्च मात्रै होइन, केही रकम बचत पनि गरौं। किनभने दसैंपछि १७ अर्ब रूपैयाँभन्दा बढीको सेयर जारी हुँदैछ।
अहिले धितोपत्र बोर्डमा आइपिओ निष्कासनको अनुमति माग्दै बीसवटा कम्पनी पुगेका छन्। यी कम्पनीले कुल १५ अर्ब २७ करोड रूपैयाँको सेयर जारी गर्ने अनुमति मागेका छन्।
यीमध्ये कतिपयले दसैंपछि सेयर जारी गर्ने अनुमति समेत पाउने सम्भावना छ।
हाललाई भने तीन कम्पनीले यस्तो अनुमति पाइसकेका छन्।
यी तीन कम्पनी हुन्- भिजन लुम्बिनी ऊर्जा कम्पनी, नेपाल वेयर हाउस कम्पनी र मुक्तिनाथ कृषि कम्पनी।
यी कम्पनीले वैदेशिक रोजगारीमा रहेकाहरूलाई समेत सेयर जारी गरिसकेका छन्। अब यिनले सर्वसाधारणमा करिब ४४ करोड रूपैयाँको सेयर गर्नेछन्।
सर्वोत्तम सिमेन्टले पनि तिहारपछि नै सेयर जारी गर्ने तयारी गरिरहेको छ। यसले करिब ६५ करोड रूपैयाँ बराबरको सेयर जारी गर्ने भएको हो।
भिजन लुम्बिनी ऊर्जा कम्पनी
भिजन लुम्बिनी ऊर्जा कम्पनीले कात्तिक १६ गतेदेखि सर्वसाधारणका लागि २० लाख ७५ हजार दुई सय ८५ कित्ता सेयर जारी गर्ने भएको छ। सर्वसाधारणबाट कम्पनीले १० करोड ७५ लाख रूपैयाँ उठाउने भएको हो।
कम्पनीले जारी गर्ने सेयर छिटोमा कात्तिक २० गते र ढिलोमा मंसिर १ गतेसम्म खुला हुनेछ।
कम्पनीले स्थानीय र वैदेशिक रोजगारीमा रहेकालाई सेयर जारी गरिसकेको छ। कम्पनीले स्थानीयलाई १४ लाख २४ हजार पाँच सय ९० कित्ता र वैदेशिक रोजगारीमा रहेकालाई एक लाख ९१ हजार दुई सय पचास कित्ता सेयर जारी गरेको हो।
कम्पनीले एक सय रूपैयाँमा अंकित मूल्यमा सेयर जारी गर्न लागेको छ। यसका लागि एक लगानीकर्ताले कम्तीमा १० कित्ता सेयरमा आवेदन दिन न्यूनतम एक हजार रुपैयाँ छुट्ट्याउनुपर्ने हुन्छ।
कम्पनीलाई इन्फोमेरिक्स क्रेडिट रेटिङ नेपालले 'आइआरएन डबल बी इस्युअर रेटिङ' प्रदान गरेको छ। यसले कम्पनीको वित्तीय दायित्व बहन गर्ने क्षमतामा औसत जोखिम रहेको जनाउँछ।
कम्पनीको सेयर निष्कासन तथा बिक्री प्रबन्धक मुक्तिनाथ क्यापिटल लिमिटेड छ।
सर्वोत्तम सिमेन्ट
सर्वोत्तम सिमेन्टले तिहारपछि सर्वसाधारणलाई सेयर जारी गर्ने तयारी गरिरहेको छ। कम्पनीले ६० लाख कित्ता सेयर सर्वसाधारणमा बिक्री गर्नेछ। कम्पनीले यसअघि भने योग्य संस्थागत सेयर लगानीकर्तालाई २५ लाख कित्ता सेयर जारी गर्नेछ।
संस्थागत सेयर लगानीकर्तालाई न्यूनतम ४०१ देखि अधिकतम ६०१ रूपैयाँमा सेयर जारी गर्नेछ। योग्य संस्थागत लगानीकर्ताले गर्ने बोलकबोलबाट निस्किने कट अफ प्राइसमा १० प्रतिशत कम मूल्य राखेर सर्वसाधारणलाई सेयर बिक्री हुने भएको छ।
कट अफ प्राइस निकाल्दा योग्य संस्थागत लगानीकर्ताले बोलकबोलमा आवेदन दिएको अधिकतम मूल्य र सो अनुसारको माग गरेको कित्ता सेयर बाँड्दै जाँदा जुन तल्लो मूल्यमा आएर उनीहरूका लागि जारी गरेको सेयर संख्या सकिन्छ, त्यही मूल्य कट अफ प्राइसका रूपमा रहन्छ।
अहिले बोलकबोलको न्यूनतम मूल्य ४०१ रूपैयाँको आधारमा कम्पनीको सेयर सर्वसाधारणले करिब ३ सय ६० रूपैयाँमा पाउने सम्भावना छ।
नेपाल वेयर हाउजिङ कम्पनी
नेपाल वेयर हाउजिङ कम्पनी लिमिटेडले १३ करोड ७५ लाख रूपैयाँ बराबरको १३ लाख ७५ हजार कित्ता आइपिओ सर्वसाधारणमा बिक्री गर्न लागेको छ।
यसमध्ये कम्पनीले वैदेशिक रोजगारीमा रहेका नेपालीका लागि १ करोड ३७ लाख ५० हजार रूपैयाँ बराबरको १ लाख ३७ हजार पाँच सय कित्ता बिक्री गर्नेछ।
कात्तिक १० गतेदेखि वैदेशिक रोजगारीमा रहेका नेपालीका लागि यो आइपिओ निष्कासन हुने भएको छ। प्रति सेयर एक सय रूपैयाँ अंकित मूल्यमै कम्पनीले आइपिओ निष्कासन गर्न लागेको हो।
वैदेशिक रोजगारीमा रहेका नेपालीले यो आइपिओ खरिदका लागि न्यूनतम १० कित्तादेखि अधिकतम ५० हजार कित्तासम्म माग गर्न सक्नेछन्। वैदेशिक रोजगारीमा रहेका नेपालीका लागि कात्तिक २४ गतेसम्म सेयर बिक्रीमा रहनेछ।
वैदेशिक रोजगारीमा रहेकालाई सेयर बिक्रीपछि कम्पनीले २७ हजार ५ सय कित्ता आफ्ना कर्मचारीहरूका लागि र ६८ हजार ७ सय ५० कित्ता सेयर सामूहिक लगानी कोषका लागि बिक्री गर्नेछ। बाँकी रहेको ११ लाख ४१ हजार २ सय ५० कित्ता सेयर भने सर्वसाधारणका लागि जारी गर्नेछ।
यसका लागि एक लगानीकर्ताले कम्तीमा १० कित्ता सेयरमा आवेदन दिन न्यूनतम एक हजार रूपैयाँ छुट्ट्याउनुपर्ने हुन्छ।
मुक्तिनाथ कृषि कम्पनी लिमिटेड
मुक्तिनाथ कृषि कम्पनी लिमिटेडले कात्तिक १० गतेदेखि वैदेशिक रोजगारीमा रहेकाहरूलाई सेयर जारी गर्ने भएको छ।
यो कृषि क्षेत्रबाट सेयर जारी गर्न लागेको पहिलो कम्पनी हो।
कम्पनीले पहिलो चरणमा १ लाख ४० हजार कित्ता सेयर वैदेशिक रोजगारीमा रहेका नेपालीहरूका लागि निष्कासन गर्न लागेको हो। यसको प्रति कित्ता सेयरको मूल्य एक सय रूपैयाँ तोकिएको छ।
कम्पनीको आइपिओमा न्यूनतम १० कित्ताका लागि आवेदन दिनुपर्ने छ भने अधिकतममा १ हजार कित्ताका लागि आवेदन दिन सकिनेछ। वैदेशिक रोजगारीमा रहेकाले आइपिओका लागि कात्तिक २४ गतेसम्म आवेदन दिन सक्नेछन्।
सर्वसाधारणका लागि भने तिहारपछि कम्पनीको सेयर जारी हुने सम्भावना छ।
वैदेशिक रोजगारीमा रहेकालाई दिएपछि बाँकी रहने १२ लाख ६० हजार कित्ता सर्वसाधारण, सामूहिक लगानी कोष लगायतलाई जारी गर्नेछ।
मुक्तिनाथ कृषि कम्पनी हो। कृषक तथा कृषि व्यवसायीहरूको उत्पादन र उत्पादकत्व वृद्धिका लागि कम्पनीले आवश्यक गुणस्तरीय उत्पादन गरिरहेको छ।
एक परिवारबाट ४/५ जनाको नामबाट समेत सेयर हाल्ने प्रवृत्ति अहिले छ। यी चार वटाको सेयर ४/५ जनाकै नाममा हाल्दा ३३ हजार रूपैयाँ हाराहारी रकम चाहिन्छ।
त्यसैले दसैंमा बालबच्चाले पाउने पाउने दक्षिणा पनि सेयरमा हालेर सदुपयोग गर्न सकिन्छ।