हिमालयन बैंकमा रहेको १२.९३ प्रतिशत सेयर बिक्री गर्न लागेको पाकिस्तानको हबिब बैंकको सेयर स्वार्थ बाझिने गरी बिक्री गर्न नदिने गभर्नर अधिकारीले बताएका छन्।
अर्थ समितिमा बुधबार भएको मौद्रिक नीतिसम्बन्धी छलफलमा गभर्नर महाप्रसाद अधिकारीले संसदहरूलाई यस्तो स्पष्टीकरण दिएका हुन्।
हबिब बैंकले बिक्री गर्न लागेको सेयर नेपाली कम्पनी हिमालयन रि–इन्स्योरेन्सले खरिद गरेर स्वीकृतिको लागि राष्ट्र बैंक पठाएको खबर सार्वजनिक भएको थियो।
गत शुक्रबार हबिब र हिमालयन रि–इन्स्योरेन्सबीच सेयर खरिद–बिक्रीको सम्झौता भएको खबर बैंकबाटै चुहाइएको थियो। बैंकको सेयर प्रतिकित्ता १ सय ३० रूपैयाँको दरमा बिक्री हुन लागेको समेत बताइएको थियो।
हालसम्म भने यस्तो कारोबार स्वीकृतिको लागि आफूकोमा नआएको पनि गभर्नर अधिकारीले स्पष्ट पारेका छन्।
पाकिस्तानको हबिब बैंकले सन् २०१८ देखि नै सेयर बिक्री गर्ने प्रयास गरेको थियो। तर, सञ्चालकहरूबाटै अवरोध भएपछि यो प्रयास सफल हुन सकेको थिएन।