मंगलबार नेप्सेमा उत्साह देखिएको छ। यसदिन नेप्से परिसूचक ३६.८६ अंकले बढेर १९८५.४४ बिन्दुमा बन्द भएको छ।
मौद्रिक नीतिको समीक्षापछि आइतबार सकारात्मक सर्किट लागेर बन्द भएको बजार सोमबार भने करेक्सनमा गयो। आज पुनः नेप्सेमा उत्साह देखिएको छ।
शुक्रबार राष्ट्र बैंकले जारी गरेको मौद्रिक नीतिको पहिलो त्रैमासिक समीक्षामा सेयर धितो कर्जाको जोखिमभार एक सय ५० प्रतिशतबाट घटाएर एक सय २५ बनाएको थियो। यससँगै लगानीकर्ताहरूमा सकारात्मक सन्देश प्रवाह भएको छ।
त्यस्तै, राष्ट्र बैंकले घर कर्जाको जोखिम भार समेत घटाएको थियो। यो निर्णयको कारण बजारमा थय ४० देखि ५० अर्ब रूपैयाँ कर्जा लगानीको लागि निस्किने गभर्नर महाप्रसाद अधिकारीले बताएका थिए।
बैंकहरूले मंसिर महिना नसकिँदै निक्षेपको ब्याजदर घटाएर सूचना प्रकाशित गर्न थालेपछि पनि बजारले वृद्धिको बाटो समातेको छ।
मंगलबार नेप्से परिसूचक बढे पनि कारोबार रकम भने अघिल्लो दिनको तुलनामा केही घटेको छ।
गत कारोबार दिन ४ अर्ब ८४ करोड २७ लाख ७४ हजार रूपैयाँको सेयर कारोबार भएकोमा यस दिन उक्त रकम घटेर ४ अर्ब ३० करोड ९० लाख १९ हजार १९६ रूपैयाँ पुगेको छ।
यस दिन २९७ वटा धितोपत्रको १ करोड २४ लाख ६३ हजार १६८ कित्ता सेयर किनबेच भएको हो।
मंगलबार २१४ कम्पनीको सेयर मूल्य बढेको छ। जसमध्ये ६ कम्पनीको सेयरमूल्यमा सकारात्मक सर्किट लागेको छ।
यस्तै, २४ कम्पनीको सेयर मूल्य घटेको छ। जसमध्ये सिवाइसी नेपाल लघुवित्तको सेयरमूल्य सर्वाधिक ५.११ प्रतिशतले घटेको छ।
उक्त कम्पनीको सेयर मूल्य एक हजार ९६ रूपैयाँमा सीमित भएको छ।
यस्तै, सिंगटी हाइड्रोको सेयर मूल्य ४.७३ प्रतिशतले घटेर प्रति कित्ता मूल्य २६२ रूपैयाँ कायम भएको छ।
मंगलबार शिवम् सिमेन्टको सर्वाधिक कारोबार भएको छ।
उक्त कम्पनीको प्रतिकित्ता ५२९ रूपैयाँमा १८ करोड ७ लाख बराबरको सेयर कारोबार भएको हो।
यो मूल्य अघिल्लो दिनको तुलनामा ८.८५ प्रतिशत बढेको हो।
सर्वाधिक सेयर खरिद–बिक्री हुने दोस्रो कम्पनीमा सोनापुर मिनरल्स रहेको छ। उक्त कम्पनीको प्रतिकित्ता ३६० रूपैयाँ ८० पैसामा १५ करोड १० लाख रूपैयाँ बराबरको सेयर कारोबार भएको छ।
त्यस्तै, आज कारोबारमा आएका १३ वटा समूहगत परिसूचकमध्ये सबै समूहको परिसूचक बढ्दा समग्र नेप्से बढेको हो।
यसदिन होटल्स तथा पर्यटन समूहमा लगानीकर्ताको उच्च आकर्षण देखिएको छ। उक्त समूहको परिसूचक सर्वाधिक ४.३३ प्रतिशतले बढेको छ।
यस्तै, जलविद्युत समूहको परिसूचक ३.३० प्रतिशतले बढेको छ।
-1746009348.jpg)
