आइतबार प्रभु बैंकका सिइओ अशोक शेरचन, डिसिओ मणिराम पोख्रेल र प्रमुख जोखिम अधिकृत रिवास श्रेष्ठ अनामनगरस्थित बैंकको केन्द्रीय कार्यालयबाट पक्राउ परे।
बैंकका पूर्वअध्यक्ष देवीप्रकाश भट्टचनमाथि प्रहरीको केन्द्रीय अनुसन्धान ब्युरो (सिआइबी) कर्जा अपचलन सम्बन्धी मुद्दा चलाइरहेकै समयमा बैंकका उच्च अधिकारीहरू पक्राउ परेका हुन्।
राष्ट्र बैंकको उजुरीको आधारमा नभइ सिआइबीमा परेको उजुरीको अनुसन्धान क्रममा उनीहरू पक्राउ परेको राष्ट्र बैंकले स्पष्ट पारेको छ।
'सामान्यतया बैंकिङ कुसरमा राष्ट्र बैंकबाट उजुरी भएर अनुसन्धान अगाडि बढ्दै जाँदा बैंकका अधिकारीहरू पक्राउ पर्ने भए पनि यो राष्ट्र बैंकको उजुरीको आधारमा भएको पक्राउ होइन,' राष्ट्र बैंकका प्रवक्ता तथा कार्यकारी निर्देशक गुरूप्रसाद पौडेलले बताए।
यस विषयमा प्रहरीबाट प्राविधिक सहयोग भने मागिएको उनले पुष्टि गरे।
यसअघि एक अर्ब रूपैयाँ ठगी भएको भन्दै प्रभु म्यानेजमेन्टकी अध्यक्ष कुसुम लामाले दिएको जाहेरीका क्रममा बैंकका पूर्वअध्यक्ष भट्टचन पक्राउ परेका थिए। सोही विषयको अनुसन्धान क्रममा बैंकका अन्य अधिकारीहरू पनि पक्राउ परेका हुन्।
बैंकबाट प्रभु म्यानेजमेन्ट प्रालिलाई दिएको कर्जाका विषयमा अनुसन्धान भइरहेको बुझिएको छ।
यो विषयमा राष्ट्र बैकले आर्थिक वर्ष २०७७/७८ मै बैंकका सिइओ शेरचन, अध्यक्ष भट्टचन लगायत व्यक्तिहरूलाई कारबाही सहित सचेत गराएको देखिन्छ।
आफ्नै लगानी भएको अर्को संस्थामा लगानी भएको पाइएपछि सो समय सचेत गरिएको थियो।
बैंक तथा वित्तीय संस्थाहरूलाई जारी गरिएको एकृकीत निर्देशन–२०७७ अनुसार बैंकबाट सञ्चालक वा निजका एकाघर परिवार सदस्यले १० प्रतिशतभन्दा बढी सेयर लिएको फर्म, कम्पनी र संस्थालाई कर्जा प्रदान गर्न बन्देज गरेको छ।
सो समय कति रकम बैंकले कर्जा लगानी गरेको थियो भन्ने खुलाइएको छैन। त्यो बेला प्रभु म्यानेजमेन्ट प्रालिमा तत्कालीन अध्यक्ष भट्टचनको समेत लगानी थियो।
सहकारी संस्थाको रकम अपचलनको विषयमा भइरहेको अनुसन्धान क्रममा बैंक समेत तानिएको हो।
प्रभु म्यानेजमेन्ट भट्टचन, कुसुम लामा र दक्ष पौडेल लगायतको लगानीमा स्थापना भएको थियो। दक्ष पौडेल प्रभु बैंकका समेत पूर्वसञ्चालक हुन्।
प्रभु समूहबाटै खोलिएको प्रभु मनी ट्रान्सफरको 'सुपर एजेन्ट' कम्पनीका रूपमा प्रभु म्यानेजमेन्ट स्थापना भएको थियो।
प्रभु म्यानेजमेन्टले प्रभु मनी ट्रान्सफरको सुपर एजेन्टका रूपमा ५ हजार सहकारीमार्फत रेमिटेन्स भुक्तानी एजेन्टको काम गर्दै आएको छ।
यस्ता सहकारीको करिब एक अर्ब रूपैयाँ धरौटीबापतको रकम फिर्ता हुन नसकेपछि अनुसन्धान भइरहेको थियो। सोही क्रममा सिआइबीले कुसुम लामासँग गरेको सोधपुछ र थप अनुसन्धानपछि तत्कालीन अध्यक्ष भट्टचन र बैंकका अधिकारीहरू पक्राउ परेका हुन्।
-1746009348.jpg)
