नेपालमा भारतीय ब्रान्ड बिकाजी फुड्सका प्रिमियम स्न्याक्स उत्पादन हुने भएको छ।
चौधरी ग्रुपले भारतको बिकाजी फुड्ससँग रणनीतिक साझेदारी गरेको छ।
चौधरी ग्रुप र बिकाजी फुड्स इन्टरनेसनल लिमिटेडबीच ५०–५० प्रतिशतको साझेदारी भएको जनाइएको छ। यस सम्झौतामार्फत भुजिया, नमकिन, पापड र प्याकेज्ड मिठाईजस्ता बिकाजीका उत्पादन नेपालमै बन्नेछन्।
नवलपरासीमा अत्याधुनिक फ्याक्ट्री स्थापना गर्न दुवै कम्पनीले संयुक्त रूपमा लगानी गर्ने बताइएको छ। उत्पादन चाँडै सुरू हुने र बजारमा उपलब्ध गराउने प्रतिबद्धता दुवै कम्पनीले गरेका छन्।
सिजी कर्प ग्लोबलका प्रबन्ध निर्देशक वरुण चौधरीले बिकाजीसँगको साझेदारीले चौधरी ग्रुपको नेपालमा विश्वस्तरीय नयाँ ब्रान्ड विस्तार गर्ने योजनालाई थप मद्दत पुगेको बताए।
'यो समझदारीले थप रोजगारी सिर्जना गर्ने, आपूर्ति श्रृंखलालाई सुदृढ बनाउने र खाद्य उद्योगलाई गतिशील बनाउन मद्दत गर्नेछ। हामी भारतका विविध स्वादलाई नेपालीहरूको दैनिक जीवनको सहज हिस्सा बनाउने लक्ष्यमा छौँ,' चौधरीले भने।
बिकाजी फुड्स इन्टरनेसनलका प्रबन्ध निर्देशक दीपक अग्रवाल खाद्य उद्योगको लागि नेपाल एक रणनीतिक बजार भएको बताए।
यो सम्झौता बिकाजीको विश्वव्यापी विस्तार यात्रामा महत्त्वपूर्ण उपलब्धि भएको उनले बताए।
'सिजीको बलियो बजार नेतृत्व र स्थानीय बुझाइको संयोजनले हामीलाई नेपाली उपभोक्ताका लागि गुणस्तरीय र सुलभ उत्पादन पुर्याउन सक्षम बनाउनेछ। यो साझेदारीले समुदाय सशक्तीकरण, आपूर्ति श्रृंखला मजबुत बनाउने र नेपालकै खाद्य प्रणालीलाई उन्नत बनाउने लक्ष्य राखेको छ,' उनले भने।
रणनीतिक साझेदारीअन्तर्गत चौधरी ग्रुपको नेतृत्वमा नेपालमै अत्याधुनिक उत्पादन तथा प्याकेजिङ एकाइ स्थापना गरिने बताइएको छ।
यसले प्रत्यक्ष तथा अप्रत्यक्ष रोजगारी सिर्जना गर्नेछ। स्थानीय उद्यमशीलता र आपूर्ति श्रृंखला सुदृढ बनाउने चौधरी ग्रुपको भनाइ छ।
चौधरी ग्रुप नेपालको पहिलो बहुराष्ट्रिय कम्पनी हो। यो हाल ३५ देशमा २०० भन्दा बढी कम्पनी सञ्चालन गरिरहेको छ।
चौधरी ग्रुप एफएमसिजी, आतिथ्य, शिक्षा, पूर्वाधार, अटोमोबाइल तथा वित्तीय क्षेत्रमा सक्रिय छ। यो विश्वव्यापी रूपमा 'वाइवाइ' चाउचाउ लागि परिचित छ।
बिकाजी फुड्स इन्टरनेसनल लिमिटेड सन् १९९३ मा स्थापना भएको हो।
यो भारतको तेस्रो ठूलो एफएमसिजी ब्राण्ड भएको बताइएको छ। भुजिया, नमकिन, मिठाई, पापड र फ्रोजन फुड्सजस्ता उत्पादन यसको प्रभुत्व छ।
यसका उत्पादन २५ भन्दा बढी देशमा निर्यात हुने गरेको छ।
-1746009348.jpg)
