भोलि (शनिबार) 'बागमती नदी महोत्सव जलजात्रा' हुने भएको छ।
नेपाल नदी संरक्षण संस्था र नेपाल एसोसिएसन अफ र्याफ्टिङ एजेन्सीज (नारा) ले शनिबार २३औं बागमती नदी महोत्सव २०८० को आयोजना गर्न लागेको हो। बागमती तथा यसका सहायक नदीहरूको बिग्रदो अवस्थालाई सुधार गर्नको लागि 'बागमती नदी महोत्सव' हुन लागेको नाराले जनाएको छ।
कार्यक्रम बिहान ७ बजे सुरू हुनेछ। थापाथलीबाट सुरू हुने जलजात्रा कार्यक्रम सुन्दरीघाटमा पुगेर टुङ्गिनेछ।
पवित्र बागमती नदीलाई संरक्षण गर्न काठमाडौंवासीहरूको माझमा बागमती नदी र यसका सहायक नदीहरूको स्थिति बारेमा जानकारी दिँदै बागमती नदीलाई माछा बाँच्न योग्य, पौडी खेल्न र पानी खान योग्य, तथा मृतकहरूको लागि शुद्ध जल तर्पण योग्य बनाउन यो जलजात्रा कार्यक्रम गर्न लागिएको नेपाल एसाेसिएसन अफ र्याफ्टिङ एजेन्सीजका अध्यक्ष शिव अधिकारीले जानकारी दिए।
'नदीको समुचित संरक्षण गरी यी क्षेत्रमा भएका सम्पूर्ण मठ–मन्दिर, देवस्थल, चिहान, धर्मशाला आदि सबैको जीर्णोद्वार र पुनः निर्माण गरी एकपटक फेरि विश्वलाई काठमाडौं उपत्यकाको सभ्यता र संस्कृतिको पहिचान गराउन सफल हुनेछौं,' उनले भने, 'बागमती नदीको मौलिक स्वरूप फर्काउन हामी सफल भयौं भने हाम्रो संस्कृतिका हराइसकेका र हराउन लागेका मूर्त, अमूर्त सम्पदा फेरि देखा परी विश्वलाई नै एउटा नौलो र बेग्लै पहिचान दिन समर्थ हुनेछौँ।'
बागमती नदिमा सदाबहार र्याफटिङ गराएर पर्यटकलाई समेत आकर्षण गराउन सकिने भएकाले यस जलजात्राको अत्यन्तै महत्व रहेको समेत उनले बताए।
नेपाल नदी संरक्षण संस्था, र नेपाल एसोसिएसन अफ र्याफटिङ एजेन्सीज तथा फेण्ड्स क्लव कुपण्डोलको संयुक्त आयोजनामा र नेपाल पर्यटन वोर्डको प्रवर्द्धन साथै अन्य विभिन्न संघसंस्थाहरूको सहकार्यमा कार्यक्रम हुन लागेको हो।
उक्त जलजात्रामा सरकारी निकाय, सञ्चारकर्मी, विद्यार्थी, स्थानीय, बागमती सफाई अभियन्ता, अधिकारकर्मी, वातावरण क्षेत्रमा कार्यरत संघसंस्था, रिभर गाइड तथा अन्य विभिन्न व्यक्तिहरू गरी करिब एक हजार जनाको सहभागिता रहने आयोजक संस्थाले जानकारी गराएको छ ।
-1746009348.jpg)
