प्रिय मेरो मुटु,
प्रिय मेरो आत्मा,
मान्छेहरू सधैँ दयालु हुँदैनन्
संसार सधैँ न्यायपूर्ण हुँदैन
तिमी नआत्तिनू
अरूको रुखोपनले तिमीलाई ढुङ्गा नबनाओस्-
तिमीलाई अझ गहिरो करुणामय बनाओस्
बेरसिला मान्छेको व्यवहारले तिमीमा घृणा नजन्माओस्-
तिमीलाई अझ सजग, विनम्र, बलियो बनाओस्।
तिनीहरूको अहंकार र अन्धकारले तिमीलाई सिकाओस्-
उज्यालो कति अमूल्य छ
तिम्रो सपना साना हुँदैनन्
तिम्रो जीवन कम मूल्यवान् हुँदैन
तिमीलाई खुसी हुने, फुल्ने, फल्ने, चम्कने पूर्ण अधिकार छ
तिमी हिरा हौ
र हिरा सजिलैमा बन्दैन-
गहिरो पृथ्वीमा, असह्य दबाबमा, लामो समयसम्म
तिम्रो यो पीडा, यो संघर्ष व्यर्थ हुने छैन
यसले तिमीलाई त्यस्तो बनाइरहेको छ
जुन कुनै सहज जीवनले कहिल्यै बनाउन सक्दैनथ्यो।
तिम्रो भित्र अनन्त शक्ति छ
ब्रह्माण्डको आशीर्वाद छ
तिम्रो हरेक सास एक विद्रोह हुनुपर्छ
यो क्रूर संसार विरुद्ध
तिम्रो मुस्कान एक विजय हुनुपर्छ
अन्यायको विरुद्ध।
तिमी पर्याप्त छौ- कसैको स्वीकृति बिना
तिमी योग्य छौ- कसैको प्रमाणपत्र बिना
तिमी असाधारण छौ- कसैको अनुमति बिना
यो तिम्रो जीवन हो
यो तिम्रो यात्रा हो
कसैले बुझे वा नबुझे पनि तिमी अघि बढ।
-1756446574.jpg)
-1746009348.jpg)
