नेपाल र भारतका प्रधानमन्त्रीले आ–आफ्नै निवासबाट मोतिहारी–अमलेखगञ्ज पेट्रोलियम पाइपलाइनको उद्घाटन गरेका छन्।
प्रधानमन्त्री केपी शर्मा ओलीले बालुवाटारबाट र भारतीय प्रधानमन्त्री नरेन्द्र मोदीले नयाँदिल्लीबाट एकै पटक स्वीच थिचेर पाइपलाइनको उद्घाटन गरेका हुन्।
मोदीले स्वीच थिचेर डिजेल ‘सेन्ड’ गरे भने ओलीले बालुवाटारबाट स्वीच थिचेर ‘रिसिभ’ गरे। यसरी रिसिभ भएको डिजेल अमलेखगञ्जमा इन्डियन आयल कर्पोरेसनका प्रतिनिधिले नेपाल आयल निगमका कार्यकारी निर्देशक सुरेन्द्र पौडेललाई जानकारी दिए।
पाइपलाइन उद्घाटनपछि भारतीय प्रधानमन्त्री मोदीले राखेको धारणाको सम्पादीत अंश:
नेपालमा हाम्रो द्वीपक्षीय परियोजनाको रिमोट उद्घाटनका लागि आज तपाईंसँग भिडिओ लिंकमा जोडिएर धेरै खुसी लागेको छ।
सन् २०१९ मेमा प्रधानमन्त्री केपी शर्मा ओलीको भारत भ्रमणका दौरानमा पूरा भइसकेका परियोजनाको छिट्टै उद्घाटन गर्न सहमत भएका थियौं। मलाई खुसी छ कि हाम्रो संयुक्त प्रयासले हाम्रा द्विपक्षीय परियोजनामा प्रगति भइरहेको छ र आज हामी मोतीहारी-अमलेखगञ्ज पाइपलाइनको संयुक्त उद्घाटनमा भाग लिइरहेका छौं।
पछिल्ला केही वर्षमा हाम्राबीच उच्च राजनीतिक तहमा अभूतपूर्व सामिप्यता आयो र हामी नियमित सम्पर्कमा छौं। पछिल्लो डेढ वर्षमा मेरा मित्र प्रधानमन्त्री ओली र म चार पटक भेटिसकेका छौं।
विकासका लागि हाम्रो साझेदारीलाई अझ सक्रिय बनाउने र नयाँ क्षेत्रमा सहयोगलाई अझ बढाउनेमा हामीले नयाँ अवसरको लाभ उठाएका छौं।
हाम्रो संयुक्त प्रयासको उद्देश्य हाम्रा नागरिकलाई लाभ मिलोस् र उनीहरूको विकास होस् भन्ने हो।
पछिल्ला पाँच वर्षमा हामीले महत्वपूर्ण द्वीपक्षीय परियोजना पूरा गरेका छौं र केही अन्य प्रयासहरूको परिणाम हात पारेका छौं।
गत वर्ष हामीले संयुक्त रूपमा पशुपतिनाथ धर्मशाला र आइसीपी वीरगञ्जको उद्घाटन गरेका थियौं।
यो धेरै सन्तोषको विषय हो कि दक्षिण एसियाको यो पहिलो क्रस बोर्डर पेट्रोलियम पाइपलाइन तोकिएकै समयभन्दा पहिला पूरा भयो। अपेक्षितभन्दा आधा समयमा यो तयार भयो। यसको श्रेय तपाईंको नेतृत्व र नेपाल सरकारको सहयोग र हाम्रा संयुक्त प्रयासलाई जान्छ।
२०७२ सालको विनाशकारी भूकम्पपछि जब नेपालले पुनर्निर्माणको कार्यभार उठायो तब भारतले आफ्नो छिमेकी र निकटतम् मित्रका नाताले आफ्नो हात सहयोगका लागि अघि बढायो। मलाई धेरै खुसी छ कि नेपालका गोरखा र नुवाकोट जिल्लामा हाम्रो आपसी सहयोगमा फेरि घर बनिरहेका छन्। आमनागरिक टाउको लुकाउने छत पाएका छन्।
मलाई खुसी छ कि हामी आफ्ना सहयोगका सबै क्षेत्रमा प्रगति गरिरहेका छौं। मलाई आशा छ कि हामी आफ्नो हिस्सालाई अझ व्यापक बनाउने तथा विविध क्षेत्रमा आफ्नो साझेदारीलाई अझ गहिरो बनाउनका लागि अझ तीव्र रूपमा अघि बढ्नेछौं।
नेपालको प्राथमिकताअनुसार उसको विकासमा सहयोग गर्न भारतको प्रतिवद्धता फेरि दोहोर्यान चाहन्छु। तपाईंलाई धेरै धेरै धन्यवाद।