नयाँ सरकारबारे के भन्छन् सहिद परिवार?
जेनजी आन्दोलनको बलमा भएको प्रतिनिधिसभा निर्वाचनले बालेन शाहको नेतृत्वमा सरकार बनाउन राष्ट्रिय स्वतन्त्र पार्टी (रास्वपा) लाई स्पष्ट 'म्यान्डेट' दिएको छ। यो सरकारबाट सारा देशले परिवर्तनको अपेक्षा गरेको छ। सबभन्दा बढी अपेक्षा ती परिवारको छ, जसका छोराछोरी जेनजी आन्दोलनमा सहिद भए।
यसै सन्दर्भमा हामीले जेनजी आन्दोलनका सहिद परिवारसँग निर्वाचन परिणामबारे उनीहरूको धारणा के छ र नयाँ बन्ने सरकारप्रति उनीहरूले के आशा लिएका छन् भनेर सोधेका छौं।
***
सिन्धुलीको गोलान्जोर गाउँपालिका–१ का ५० वर्षीय युवराज न्यौपानेका आँखामा अझै पनि त्यो दिनको तस्बिर ताजै छ।
भदौ २३ गते बिहान घरबाट निस्कँदा उनका जेठा छोरा योगेन्द्र न्यौपानेले भनेका थिए, 'बुबा, भ्रष्टाचारविरूद्ध आवाज उठाउनुपर्छ, देश बदलिनुपर्छ।'
त्यस दिन योगेन्द्र आफ्ना साथीहरूसँग जेनजी आन्दोलनमा सहभागी हुन काठमाडौंको नयाँबानेश्वर पुगेका थिए।
उनी त्यहाँबाट फर्केर आएनन्।
भक्तपुरको चाँगुनारायण नगरपालिका–१ मा बस्दै आएका उनी त्रिचन्द्र कलेजमा राजनीतिशास्त्रमा स्नातकोत्तर पढिरहेका थिए। घरका जेठा छोरा योगेन्द्रमाथि परिवारको आशा टिकेको थियो। तर आन्दोलन क्रममा भएको हिंसामा उनले ज्यान गुमाए।
'आज पनि युवराजको मनमा एउटै पीडा छ। भ्रष्टाचारविरूद्ध आवाज उठाउँदा छोराले ज्यान गुमाउनुपर्यो,' उनले भक्कानिँदै भने।
पीडासँगै उनको मनमा एउटा आशा पनि बाँचेको छ।
उनलाई विश्वास छ — अब बन्ने सरकार फरक हुनेछ। किनकि, यस पटक सदनमा तिनै व्यक्तिहरू पुगेका छन्, जसले सडकमा ओर्लिएर भ्रष्टाचारविरूद्ध आवाज उठाएका थिए।
'अब भ्रष्टाचारविरूद्ध फेरि सडकमा ओर्लिन नपरोस्,' युवराजले भने, 'सरकारको गोली लागेर कसैले ज्यान गुमाउन नपरोस्। जनताको छोराछोरी मारेर राजनीति नगरियोस्।'
उनको एउटा अर्को पनि अपेक्षा छ — नयाँ सरकारले आन्दोलनमा ज्यान गुमाउने सहिद परिवार र घाइतेहरूलाई न्याय दिनुपर्छ।
सहिदका परिवारलाई निःशुल्क शिक्षा, स्वास्थ्यमा सहुलियत र आवश्यक सहयोग दिने नीति बन्नुपर्ने उनी बताउँछन्। त्यस्तै, घाइतेहरूलाई उपचारसँगै भत्ता र रोजगारीको व्यवस्था गर्नुपर्ने उनको भनाइ छ।
'घटना भएको यति छिट्टै मानिसहरूले जेनजी आन्दोलनका घाइते र सहिदहरूलाई बिर्सिने छैनन् होला,' उनले भने, 'सहिद परिवारका लागि केही गर्छन् भन्ने आस गरेर नै मैले भोट दिएको छु।'
युवराजको परिवार कहिल्यै कुनै राजनीतिक दलसँग जोडिएको थिएन। अघिल्ला चुनावहरूमा उनी मतदान केन्द्र पुगेर मन लागेको उम्मेदवारलाई भोट हालेर फर्किन्थे। यस पटक भने उनले महिनौंअघि नै निर्णय गरिसकेका थिए।
उनका अनुसार राष्ट्रिय स्वतन्त्र पार्टी (रास्वपा) का सभापति रवि लामिछाने कारागारबाट निस्किएपछि सहिद परिवारलाई भेट्न गएका थिए। उनले सहिद परिवारका कुरा सुने, दु:खमा साथ दिए। त्यसले नै रास्वपाप्रति विश्वास पलाएको उनी बताउँछन्।
युवराजको अर्को ठूलो चाहना पनि छ।
'सहिदहरूको बलिदान इतिहासमा हराएर जान हुँदैन। सहिदका सालिक गृहजिल्लामा बनाइनुपर्छ, ताकि अहिलेका मात्र होइन, आगामी पुस्ताले पनि उनीहरूको कथा सम्झिरहून्,' उनले भने।
उनले अगाडि भने, 'सहिदका कथा पुस्तकमा पनि समेटिनुपर्छ। त्यसबाट मात्र नयाँ पुस्ताले परिवर्तनको मूल्य कति ठूलो हुन्छ भन्ने बुझ्नेछन्।'
छोरा गुमाएको बुबाको पीडा कहिल्यै मेटिँदैन।
युवराज न्यौपाने भने पीडा सँगसँगै एउटा विश्वास बोकेर बाँचिरहेका छन्, 'मेरो छोराको बलिदान व्यर्थ जाने छैन, र एकदिन यही बलिदानले देशलाई बदल्नेछ।'
***
यी पनि पढ्नुहोस्:
-1746009348.jpg)
