सत्तारूढ नेपाल कम्युनिष्ट पार्टी (नेकपा) का सचिवालय सदस्य बामदेव गौतमले मंसीर १४ गते हुने उपनिर्वाचनमा कास्की निर्वाचन क्षेत्र नम्बर २ मा आफू उम्मेदवार नहुने घोषणा गरेका छन्।
शनिबार अपरान्ह प्रधानमन्त्रीको सरकारी निवास बालुवाटारमा बसेको सचिवालय बैठकमा आफू स्व. रवीन्द्र अधिकारीको निर्वाचन क्षेत्रमा चुनाव नउठ्ने बताएका हुन्। अधिकारीको हेलिकोप्टर दुर्घटनामा निधन भएपछि यो क्षेत्रमा उपनिर्वाचन हुँदैछ।
‘मेरा समस्त शुभचिन्तक महानुभावलाई जानकारीका लागि आज बसेको पार्टीको सचिवालय बैठकमा मैले आफू कास्की जिल्लाको रिक्त प्रतिनिधिसभा सदस्य पदका लागि उम्मेदवारी नदिने जानकारी गराएको छु,’ गौतमले भनेका छन्।
उनले कास्कीमा निर्वाचन उठ्न अनुरोध गर्ने अध्यक्षद्वयलाई धन्यबाद पनि दिएका छन्। गौतम बर्दिया १ बाट २०७४ सालको संघीय निर्वाचनमा नेपाली कांग्रेसका उम्मेदवार सञ्जय गौतमसँग पराजित भएका थिए।
बर्दियाभन्दा कम मतान्तर रहेको कास्कीमा आफू फेरि पराजित हुने अवस्था आउने पनि उनले उल्लेख गरेका छन्।
‘यसअघि २०७४ मा प्रतिनिधिसभा सदस्य पदका लागि आफ्नो पुरानो निर्वाचन क्षेत्र बर्दिया १ बाट उम्मेदवार भएको यहाँहरुमा विदितै छ। उक्त निर्वाचनमा तत्कालीन वाम गठबन्धनसँग विपक्षीको तुलनामा ३२ हजार मत बढी थियो। तर, म पराजित हुनुपर्यो,’ उनले भनेका छन्, ‘त्योभन्दा अत्यन्त कम मतान्तर रहेको कास्कीमा निर्वाचन उठ्नु भनेको म फेरि पराजित हुनु हो। तर मलाई विश्वास छ मभन्दा अरुकोही स्थानीय कमरेड उठनु हुँदा सहजै विजय प्राप्त गर्न सक्नु हुनेछ।’
उनले कास्कीको निर्वाचनमा त्यहाँका स्थानीय नेता उम्मेदवारीका निम्ति पहिलो हकदार हुने पनि बताएका छन्।
‘कास्कीलाई कार्यक्षेत्र बनाएर पार्टी काम गरिरहनु भएका कमरेडमध्येबाट उम्मेदवार हुनुपर्ने कुरामा आफ्नो स्पष्ट अडान पेश गर्दछु,’ उनले भनेका छन्।
