मसलाका रूपमा प्रचलित ल्वाङ निकै गुणकारी हो भनेर आर्यन पौडेलले सानै उमेरदेखि सुन्दै आएका थिए। अस्ट्रेलिया गएपछि त्यो अनुभव आफै गरे।
आर्यन आठ वर्षअघि नर्सिङ अध्ययनका सिलसिलामा अस्ट्रेलिया गएका थिए। त्यहाँ उनले हरेक बिहान कफीमा ल्वाङ मिसाएर पिउन सुरू गरे।
'नेपाल छँदा आफूले कहिल्यै केही पकाएको थिइनँ। आमाबुबाले पकाएर दिनुहुन्थ्यो। अस्ट्रेलिया टेकेपछि धेरै कुराहरू सिकियो,' २५ वर्षीय आर्यनले भने।
बिहान कफीमा ल्वाङ हालेर पिउँदा उनलाई ताजा महसुस हुन्थ्यो। शरीरको 'इम्युनिटी पावर' बढेजस्तो लाग्थ्यो। उनको पेट ढुस्स हुने समस्या पनि हट्यो।
'पाचन प्रणाली नै राम्रो भएको अनुभव भयो,' उनले भने।
आर्यन जिम गएर थकित भएका हुन्थे। ल्वाङ कफी पिएपछि शरीरमा तागत भरिँदै गएजस्तो अनुभव गर्थे। जसले गर्दा आफ्नो दैनिकीमा उनले ल्वाङ कफीलाई निरन्तरता दिइरहे।
हरेक दिन आफूले पिइरहँदा यो स्वाद त धेरै जनाले पिउनुपर्छ भन्ने उनलाई लाग्न थाल्यो। अनि यसबारे उनले खोजबिन र अनुसन्धान गरे।
'यस्तो राम्रो चिज मैले मात्रै पिइरहेको छु, यो त धेरैसम्म पुग्नुपर्छ भन्ने लाग्यो। अनि मैले व्यवसाय सुरू गरेँ,' उनले भने।
आर्यनले सन् २०२५ मार्चदेखि अस्ट्रेलियाबाटै 'ल्वाङ ब्ल्याक' नामक कफी व्यवसाय सुरू गरे। सबभन्दा पहिले उनले मेलबर्नमा भएको 'नेपाल फेस्टिभल' मा ल्वाङ ब्ल्याकको स्टल राखे। त्यहाँबाट ल्वाङ ब्ल्याक धेरैसम्म पुग्यो।
आर्यन सामाजिक सञ्जालका इन्फ्लुएन्सर पनि हुन्। सामाजिक सञ्जालबाटै यो कफी अझ धेरैसम्म पुगेको उनले बताए।
ल्वाङ ब्ल्याक कफी र ल्वाङको मिश्रण हो। उनी यसलाई गुणस्तरीय कफीका दाना र ल्वाङ मिसाएर तयार गरिएको प्रिमियम कफी भन्छन्।
ल्वाङ ब्ल्याक कफी ब्रान्ड सुरू गर्न आफूले १२ हजार अस्ट्रेलियन डलर लगानी गरेको उनले बताए।
उनका अनुसार ल्वाङ ब्ल्याक फ्रेन्च प्रेस मेसिनमा तयार गरेर पिउन सकिन्छ। यसले कफी र ल्वाङको मिश्रणबाट सुगन्धित स्वाद निकाल्न मद्दत गर्छ।
छोटो समयमै उनले ल्वाङ ब्ल्याकलाई अस्ट्रेलियासहित क्यानडा, जापान, नेपाल र न्युजिल्यान्ड गरी पाँच मुलुकमा फैलाइसकेका छन्।
नेपालमा जेनजी आन्दोलनपछि सुरू गरेका हुन्।
'म ल्वाङ ब्ल्याक सुरू गर्न नेपाल आएकै बेला जेनजी आन्दोलन भयो। म पनि त्यही पुस्ताको भएको र देशमा धेरै कुराहरूमा परिवर्तन आवश्यक परेको महसुस गरेपछि आफै पनि आन्दोलनमा सहभागी भएँ। आन्दोलनपछि काम सुरू गरेँ,' आर्यनले भने।
उनले अस्ट्रेलियाको बजारका लागि त्यहीँ उत्पादन भएको कफी प्रयोग गर्छन्। त्यसबाहेक नेपाल, जापान, क्यानडा, न्युजिल्यान्डका लागि नेपालमा उत्पादित कफी प्रयोग गर्छन्।
खासगरी गुल्मीमा फलेको राम्रो गुणस्तरको कफीबाट ल्वाङ ब्ल्याक तयार गरिएको उनले बताए।
'नेपालमा कफी धेरै नै उत्पादन हुन थालेको रहेछ। तर सोझै विदेश निर्यात भइहाल्ने हुँदा राम्रो गुणस्तरको कफी दाना खोजे जति पाउन मुस्किल पर्छ। पाएसम्म हामी संकलन गरेर तयार गरिरहेका छौं,' आर्यनले भने।
अस्ट्रेलियामा कफीको बजार निकै राम्रो छ। जापान, नेपाल लगायत मुलुकमा पनि कफी पारखीहरू बढिरहेका उनले बताए।
ल्वाङ ब्ल्याक अनलाइनबाट अर्डर गर्न सकिन्छ। यसका लागि देशैपिच्छेका फरक वेबसाइट छन्। सामाजिक सञ्जालहरूबाट पनि अर्डर टिपाउन सकिन्छ।
'व्यापार राम्रो छ। जे होस्, कम समयमै खान पुगिरहेको छ भनौं न,' उनले हाँस्दै भने।
नेपालमा २५० ग्रामको ल्वाङ ब्ल्याक किन्नुपरे एक हजार पाँच सय ९९ रूपैयाँ पर्छ। फ्रेन्च प्रेस मेसिन पनि सँगै लिँदा तीन हजार एक सय रूपैयाँ पर्छ। पाँच सय ग्राम र फ्रेन्च प्रेस किन्दा चार हजार ९९ रूपैयाँ पर्ने उनले बताए।
'फ्रेन्च प्रेस एक पटक किनेपछि पटक पटकलाई हुने भयो। कफी सकिएपछि फेरि मगाउनेहरू धेरै हुनुहुन्छ। यो हाम्रा लागि राम्रो कुरा हो,' उनले भने।
आर्यनको पेसा भने एनेस्थेटिक नर्स हो। एनेस्थेटिक नर्सको काम चिकित्सकले शल्यक्रिया गर्नुअघि बिरामीलाई बेहोस बनाउने औषधि दिने र निगरानी गर्ने हो। तर आफूलाई नर्स पेसाभन्दा पनि आफै केही गर्ने हुटहुटी जागेकाले ल्वाङ ब्ल्याक सुरू गरेको उनले बताए।
'मैले तयार गरेको ल्वाङ ब्ल्याकलाई व्यवसायभन्दा पनि ब्रान्डका रूपमा लैजाने विचार छ। यो स्वास्थ्यवर्द्धक उत्पादन सकेसम्म धेरै देशमा पुर्याउने योजना छ,' उनले भने।
अहिले पाँच देशमा फैलिए पनि ल्वाङ ब्ल्याकका धेरै ग्राहक विदेशमा बस्ने नेपाली नै हुन्। करिब पाँच प्रतिशत मात्रै अन्य मुलुकका ग्राहक रहेको उनले बताए।
'पाँच वर्षमा अझ धेरै देशका मानिससम्म पुग्ने सोचेको छु,' उनले भने।
आर्यनले भविष्यमा ल्वाङ ब्ल्याकका लागि चाहिने कफी नेपालमा आफै फलाउने समेत सोचेका छन्। तर नेपालमा धेरै चुनौतीहरू सामना गर्नुपर्ने भएकाले धेरै पटक सोच्न बाध्य हुनुपरेको उनी बताउँछन्।
'नेपाल मेरो पहिलो घर हो, अस्ट्रेलिया दोस्रो,' बुटवलमा जन्मिएका आर्यनले भने, 'तर नेपालमा काम सुरू गरेपछि कति पटक त हार खाइसकेको छु।'
ल्वाङ ब्ल्याकका लागि चाहिने बट्टा, कागज लगायत प्याकेजिङ सामग्री आयात गर्दा समेत भन्सारमा निकै दुःख झेल्नुपरेको उनको गुनासो छ। यस्ता घटनाले नेपालमा पनि केही गर्छु भनेर अघि बढिरहेको आफू निरूत्साहित भएको उनले बताए।
'अस्ट्रेलिया, न्युजिल्यान्ड जस्ता देशमा व्यवसाय गर्न हामी नेपालीलाई समेत कति सजिलो छ,' आर्यनले भने, 'नेपालमा भने नेपालीलाई नै टाउको दुखाइ हुन्छ।'
-1756794700.JPG)
-1746009348.jpg)
