प्रमुख प्रतिपक्षी दल नेपाली कांग्रेसका सभापति शेरबहादुर देउवाले वार्ताबाटै नेपाल-भारत सीमा विवाद हल गर्नुपर्ने बताएका छन्।
प्रधानमन्त्री केपी शर्मा ओलीले शनिबार बालुवाटारमा राखेको सर्वपक्षीय बैठकमा सभापति देउवाले कुटनीतिक तवरबाटै सीमा विवाद हल गर्न र अतिक्रमित भूमि फिर्ता ल्याउन पहल गर्नुपर्ने बताएका हुन्।
भारतले जारी गरेको राजनीतिक नक्सामा नेपालका भूमि कालापानी, लिपुलेकलगायत परेपछि विवाद उत्पन्न भएको छ। यसबारे भारतसँग कुराकानी गर्नुअघि प्रधानमन्त्री ओलीले राजनीतिक दल, पूर्वपरराष्ट्रमन्त्रीहरू, सीमाविद्सँग शनिबार छलफल गरेका हुन्।
बैठकपछि बाहिरिएका सभापति देउवाले पत्रकारहरूसँग भने, ‘कालापानी हाम्रो हो। वार्ताबाटै सीमा विवाद समाधान गर्नुपर्छ।’
कांग्रेस प्रवक्ता विश्वप्रकाश शर्माका अनुसार सभापति देउवाले भारतबाट अतिक्रमित भूमि फिर्ता लिन नेपाल सरकारले पहल गर्नुपर्नेमा सभापति देउवाले जोड दिएका हुन्। ‘अतिक्रमित भूमि फिर्ता ल्याउन सरकारले उच्चस्तरीय कुटनीतिक र राजनीतिक पहल गर्नुपर्छ। यसका लागि कांग्रेसको पूर्ण साथ रहन्छ,’ सभापति देउवाको भनाइ उद्धृत गर्दै शर्माले भने।
यसअघि सभापति देउवाले भारतीय राजदूत मञ्जीवसिंह पुरीलाई टेलिफोन गरेर ‘कालापानी र लिपुलेक नेपालको अविभाज्य भूमि’ रहेको बताएका थिए।