नेपाली कांग्रेसका महासमिति सदस्य ललनकुमार रायको बस दुर्घटनामा मृत्यु भएको छ ।
पूर्व पश्चिम राजमार्गअन्तर्गत महोत्तरीको बर्दिबास नगरपालिका–५ स्थित टुटेश्वर चोकमा मंगलबार बिहान भएको बस दुर्घटनामा रायको मृत्यु भएको हो।
महोत्तरीको मनरासिस्वा नगरपालिका–१० बथनाहा गाउँ बस्ने ५८ वर्षीय कांग्रेस नेता रायको निधन भएको प्रहरी उपरीक्षक श्यामकृष्ण अधिकारीले जानकारी दिए।
काठमाडौँबाट आउँदै गरेको ना५ख ६४११ नम्बरको गङ्गोत्री बसले उखु लोड गरी रोकिराखेको ना४ख ५८१३ नम्बरको ट्रकमा बस ठोकिएर दुर्घटना भएको थियो ।
आज बिहान ५ बजे भएको सो दुर्घटनामा परी नेता राय गम्भीर घाइते भएर उपचारका लागि जनकपुर अञ्चल अस्पतालमा पठाइएकामा त्यहाँबाट उनलाई थप उपचारका लागि विराटनगरस्थित नोबेल अस्पतालमा पुर्याइएको थियो। अस्पताल जाने बित्तिकै बिहान करिब ९ बजेतिर चिकित्सकले उनलाई मृत घोषणा गरेको आफन्त असिम दुबेले बताए।
नेता राय २०६४ सालमा भएको संविधानसभाको पहिलो निर्वाचनमा महोत्तरीको क्षेत्र नम्बर ४ बाट नेपाली कांग्रेसका उम्मेदवार रहका थिए भने उनले प्रजातान्त्रिक आन्दोलनमा समेत महत्वपूर्ण भूमिका खेलेका थिए।
त्यसैगरी सोही दुर्घटनामा परी १८ जना अन्य कांग्रेसकै नेता तथा कार्यकर्तासहित सर्वसाधारण यात्रु पनि घाइते भएका छन्। उनीहरुको उपचार बर्दिबासको शुभ स्वस्तिक, जनसेवा, सिटी र बर्दिबास अस्पतालमा उपचार भइरहेको प्रहरी उपरीक्षक अधिकारीले बताए।