राष्ट्रिय जनता पार्टी नेपालले संविधान संशोधनलगायत आफ्ना माग पूरा नभई सरकारमा जाने सम्भावना नरहेको बताएको छ।
सभामुख अग्निप्रसाद सापकोटालाई मंगलबार संसद बैठकमा बधाई तथा शुभकामना दिँदै राजपा अध्यक्ष मण्डलका संयोजकसमेत रहेका सांसद महेन्द्रराय यादवले अहिलेकै अवस्थामा सरकारलाई समर्थन गर्न नसकिने प्रष्ट पारे।
‘यो संविधानका राम्रा पक्ष संस्थागत गर्न र पूर्णता दिन हाम्रो माग हो। चुनावमा गरेका बाचाअनुसार संविधान संशोधन आवश्यक छ। सरकारले प्रक्रिया अघि बढाउनुपर्यो,’ उनले भने, ‘राजपा माग र मुद्दाका लागि निर्माण भएको हो, सत्ताका लागि होइन।’
उनले संविधान संशोधन, रेशम चौधरी जेलमुक्त हुने वातावरण मिले सरकारलाई समर्थन हुन सक्ने बताए।
‘सरकारलाई समर्थन दिन तयार छौं, सरकारले कति दिनसम्म हाम्रो समर्थन चाहन्छ?,’ उनले भने, ‘तर माग र मुद्दालाई पहिले संशोधन गर्नुपर्यो। जेलमा भएका मान्छे छुट्नुपर्यो। रेशम चौधरी छुट्नुपर्यो।’
सरकारलाई एक वर्ष समर्थन गरिसकेको उनले बताए।
‘सरकारले माग र मुद्दाका बारेमा वातावरण नबनाउने? पहिले एक वर्ष समर्थन गरेको हो,’ उनले भने, ‘सरकारले हाम्रो समर्थन लिने अनि काम नगर्ने? सरकारमा जाने कुनै संभावना छैन।’
उनले सत्तारूढ नेपाल कम्युनिष्ट पार्टी नेकपाले मधेशी दलभित्र खेल्न खोजेको पनि उल्लेख गरे।
‘१८ महिना एउटा (समाजवादी पार्टी) लाई ल्याउने अनि अहिले अर्को?,’ उनले भने।
उनले संविधान संशोधन नभए जनतालाई धोका हुने पनि बताए।
‘असोज ३ लाई कालो दिन भनेका छौं। संविधान संशोधन हुनुपर्छ,’ उनले भने।
सरकारसँग उपसभामुख नमागेको उनले बताए।
‘सरकारसँग उपसभामुख मागेकै छैन। नमाग्दा पनि दियो भने पार्टीमा छलफल गर्छौं। नमागे पनि दिने राजपाप्रति सरकारको दृष्टिकोण के हो?,’ उनले प्रश्न गरे।
-1746009348.jpg)
