सत्तारूढ नेपाल कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ले कोरोना भाइरसको रोकथामका लागि सहयोग गर्न चिनियाँ राष्ट्रपति सी चिनफिङलाई पत्र पठाएका छन्।
चार दिन अगाडि पठाएको पत्रमा प्रचण्डले नेपाल कोरोनाको महामारीसँग जुधिरहेकाले सहयोगका लागि आग्रह गरेका छन्।
उनले कोरोना महामारी नियन्त्रण गर्न सफल भएकोमा राष्ट्रपति सीलाई बधाई समेत दिएका छन्।
'चार दिनअगाडि अध्यक्षले औपचारिक पत्र पठाउनुभएको छ,' प्रचण्डकी स्वकिय सचिव गंगा दाहालले सेतोपाटीसँग भनिन्,'कोरोना रोक्न सफल भएकोमा बधाई र नेपाललाई सहयोग गर्न आग्रहसमेत गर्नुभएको छ।'
पत्रमा उनले औषधि र अन्य मेडिकल सामाग्री सहयोग गर्न समेत भनेका छन्।