संघीय लोकतान्त्रिक मोर्चाले राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह प्रधानमन्त्री हुन लागेकोमा खुसी व्यक्त गरेको छ।
शुक्रबार जसपा नेपालका संरक्षक महन्थ ठाकुरको अध्यक्षतामा बसेको मुल समितिको बैठकले रास्वपाका वरिष्ठ नेता शाह प्रधानमन्त्री बन्ने हर्षको विषय भएको बताएको छ।
‘प्रतिनिधिसभा सदस्य निर्वाचन २०८२ मा मधेशी सपूत मा. बालेन्द्र शाह (बालेन) को नेतृत्वलाई आम जनताले व्यापक जनसमर्थन प्रदान गरेकोले नीजलाई प्रधानमन्त्रीको रूपमा हेर्न पाउनु हामी लामो समयदेखि संघर्षरत मधेशी, थारू, आदिवासी जनजाति लगायत उत्पीडित समुदायको निम्ति हर्षको विषय हो,’ मोर्चाले भनेको छ।
मोर्चाले बालेनलाई शुभकामना र बधाई समेत दिएको छ।
यस्तै संविधान संशोधन लगायत विविध विषय सम्बोधन हुनेमा पनि मोर्चाले विश्वास व्यक्त गरेको छ।
‘नेपाली जनताले विगत लामो समयदेखि गरेको संघर्ष र बलिदानबाट स्थापित गणतन्त्र, संघीयता, लोकतन्त्र, समावेशीता लगायतको प्राप्त उपलब्धिहरुलाई संस्थागत गर्दै संविधान संशोधन, सिमांकन हेरफेर, जनसंख्याको आधारमा प्रतिनिधित्व, लाल आयोगको प्रतिवेदन सार्वजनिक, संघीयतालाई अझ बलियो बनाउने लगायतका मुद्दाहरुको सम्बोधन हुने विश्वास समेत व्यक्त गर्दछौं,’ मोर्चाले भनेको छ।
-1746009348.jpg)
