भारतको सत्तारूढ दल भारतीय जनता पार्टीले आज ४०औं स्थापना दिवस मनाउँदै छन्।
पार्टी स्थापना दिवसका अवसरमा उक्त पार्टीले आफ्ना कार्यकर्तालाई एक छाकमात्रै खाना खान भनेको छ।
भाजपाका राष्ट्रिय अध्यक्ष जेपी नड्डाले सबै कार्यकर्तालाई एक छाकमात्रै भोजन गर्न आग्रह गरेका हुन्।
लक डाउनका कारण समस्या परिरहेका व्यक्तिप्रति सहानुभूति व्यक्त उनले एक समयको खाना त्याग्न भनेका हुन्।
'सबै कार्यकर्ता स्थापना दिवसको अवसरमा एक समयको खाना त्यागेर लक डाउनको समयमा कष्ट झेलिरहेका व्यक्तिहरू प्रति सहानुभूति व्यक्त गर्नु,' स्थापना दिवसमा नड्डाले जारी गरेको सन्देशमा भनिएको छ।
नड्डाको उक्त सन्देश पालना गर्न प्रधानमन्त्री नरेन्द्र मोदीले पनि कार्यकर्तालाई अनुरोध गरेका छन्।
नड्डाले कोरोना भाइरससँग लड्न बनाइएको कोषमा दान गर्नसमेत कार्यकर्तालाई भनेका छन्।
हरेक कार्यकर्ताले अन्य ४० जनालाई पिएम केयर्स फन्डमा सय रूपैयाँ दान गर्न लगाउन समेत भाजपाले भनेको छ।
यसअघि प्रधानमन्त्री मोदीको अनुरोधमा आइतबार स्थानीय समयअनुसार राति ९ बजेपछि ९ मिनेटसम्म भारतमा बिजुली बत्ती निभाएर दीयो, मैनबत्ती बालिएको थियो।
