नेपाली कांग्रेसले संविधान संशोधनको प्रस्ताव पुन: संसदमा दर्ता गर्ने भएको छ।
सभापति शेरबहादुर देउवाले नेतृत्व गरेको अघिल्लो सरकारले संसदमा प्रस्तुत गरेकै संविधान संशोधनको प्रस्ताव पुन: दर्ता गर्ने तयारीमा कांग्रेस छ।
मधेशका जनताको मागअनुसार देउवा सरकारले संविधान संशोधन गर्न संसदमा प्रस्ताव लगे पनि तत्कालीन नेकपा एमालेलगायत दलले समर्थन नगरेपछि पास भएको थिएन।
अद्यावधिक नक्सा संविधानमा राख्ने प्रस्तावमा भने कांग्रेसले मतदान गर्ने भएको छ। शनिबार बसेको केन्द्रीय समिति बैठकले संसदीय दललाई संशोधनका पक्षमा मतदान गर्न निर्देशन दिएको हो।
यस्तै कांग्रेसले संसदीय दललाई देउवा सरकारका पालामा प्रस्तुत संशोधन प्रस्ताव पुन: दर्ता गर्न निर्देशन दिएको हो।
‘सभापति एवं तत्कालीन प्रधानमन्त्री शेरबहादुर देउवाले नेतृत्व गर्नु भएको सरकारले अघिल्लो संसदमा प्रस्तुत गरेको संविधान संशोधनको प्रस्ताव पुनः दर्ता गर्न संसदीय दललाई निर्देशन गर्ने निर्णय यो बैठक गर्दछ,’ शनिबार राति सकिएको कांग्रेस केन्द्रीय समितिको निर्णयमा उल्लेख छ।
देउवा सरकारले लगेको संविधान संशोधनको प्रस्तावमाथि २०७४ भदौ ५ गते संसदमा मतदान भएको थियो।
पक्षमा कांग्रेस, माओवादी केन्द्र, राजपालगायत दलले समर्थन गरे पनि नेकपा एमाले, राप्रपा, नेककिपा, राजमोलगायत दल विपक्षमा उभिएका थिए।
शनिबारको बैठकमा मधेशका जनताको मागअनुसार संविधान संशोधन प्रस्ताव अघि बढाउनुपर्ने उपसभापति विमलेन्द्र निधिलगायतले माग गरेका थिए।
केही समयअघि राजपा र समाजवादीका शीर्ष नेताले सभापति देउवालाई भेटेर अद्यावधिक नक्सा र मधेशका जनताको मागअनुसार प्याकेजमै संविधान संशोधनका पक्षमा उभिन आग्रह गरेका थिए।
यो पनि:
संविधान संशोधनका पक्षमा मतदान गर्ने कांग्रेसको निर्णय