प्रधानमन्त्री एवम् नेकपा अध्यक्ष केपी शर्मा ओलीले पार्टीको विवाद समाधानका लागि सचिवालय बैठक गर्ने प्रस्ताव गरेका छन्।
प्रधानमन्त्री निवास बालुवाटारमा भएको अर्का अध्यक्ष पुष्पकमल दाहाल ‘प्रचण्ड’सँगको छलफलमा प्रधानमन्त्री ओलीले यस्तो प्रस्ताव राखेका हुन्।
सोमबारको छलफलमा वरिष्ठ नेता झलनाथ खनाल र स्थायी कमिटी सदस्य सुवास नेम्वाङ पनि सहभागी थिए।
आइतबार पनि प्रधानमन्त्री ओलीले सचिवालय बैठककै प्रस्ताव गरेका थिए।
अर्का अध्यक्ष प्रचण्ड र वरिष्ठ नेता खनालले भने स्थायी कमिटीबाटै समस्याको समाधान खोजिनु पर्ने जवाफ दिएका छन्।
'विवाद जहाँको त्यहीँ छ। आ-आफ्ना अडान कायमै छन्,' स्रोतले सेतोपाटीसँग भन्यो,'सचिवालय बैठक बस्ने कि स्थायी कमिटी भन्नेमै विवाद छ।'
सचिवालयमा आफ्ना पक्षमा बहुमत पुग्ने भएपछि पछिल्लो समय प्रधानमन्त्री ओली सचिवालय बैठकका पक्षमा छन् भने प्रचण्ड स्थायी कमिटी बैठक बोलाउनु पर्ने अडानमा छन्।
गत साउन १३ गते प्रधानमन्त्रीले एकतर्फी रूपमा स्थायी कमिटी बैठक स्थगित गरेपछि प्रचण्डले स्थायी कमिटी बैठकको अध्यक्षता गरेका थिए।
२९ जना सहभागी स्थायी कमिटी बैठकमा बरिष्ठ नेता खनाल र माधव नेपाल पनि सहभागी थिए।
सोमबारको बैठकमा कुनै निष्कर्ष ननिस्केको वरिष्ठ नेता झलनाथ खनालका स्वकिय सचिव कृष्ण भट्टराईले सेतोपाटीलाई बताए।
सौहार्दपूर्ण तरिकाले कुराकानी भएको र मंगलबार फेरि बैठक बस्ने भट्टराईले जानकारी दिए।
