पार्टीभित्र देखिएको विवादको समाधानबारे सत्तारूढ नेपाल कम्युनिष्ट पार्टीका अध्यक्षद्वय केपी शर्मा ओली र पुष्पकमल दाहाल ‘प्रचण्ड’ बीच शुक्रबार पनि छलफल भएको छ।
प्रधानमन्त्री ओलीसँगको छलफलका लागि प्रचण्ड केहीबेर अघि बालुवाटार पुगेको स्रोतले जानकारी दियो।
यसअघि दुई अध्यक्षबीच बिहीबार पनि छलफल भएको थियो। बिहीबारको छलफलमा महासचिव विष्णु पौडेल, प्रदेश ५ का मुख्यमन्त्री शंकर पोखरेल, स्थायी कमिटी सदस्य जनार्दन शर्मा पनि सहभागी थिए। आजको छलफलमा उनीहरू सहभागी छन् कि छैनन् भन्ने खुलिसकेको छैन।
बिहीबारको बैठकपछि प्रचण्डले आफूपक्षीय नेता कार्यकर्तालाई ओलीसँग भएको छलफलबारे ब्रिफिङ गरेका थिए।
प्रचण्ड' ले प्रधानमन्त्री तथा पार्टी अध्यक्ष केपी शर्मा ओलीसँग भएको कुराकानीबारे पार्टीका वरिष्ठ नेता र केन्द्रीय सदस्यहरूलाई ब्रिफिङ गरेका छन्।
ओलीसँगको छलफलपछि उनले थापागाउँस्थित एक निजी कलेजमा आयोजित भेलालाई सम्बोधन गरेका थिए।
उक्त भेलामा वरिष्ठ नेता झलनाथ खनाल, माधव नेपाल, पार्टी प्रवक्ता नारायणकाजी श्रेष्ठ, कृषिमन्त्री एवं स्थायी कमिटी सदस्य घनश्याम भुषाल, स्थायी कमिटी सदस्य गोकर्ण विष्टसहित प्रदेश-५ का दुई दर्जनभन्दा बढी केन्द्रीय सदस्य उपस्थित थिए।
उक्त कार्यक्रममा प्रचण्डले बालुवाटार बैठकमा भएका केही कुरा भनेका थिए। त्यसपछि पार्टीका वरिष्ठ नेताहरूसँग अलग्गै कुराकानी गर्दै बालुवाटार बैठकबारे ब्रिफिङ गरेको प्रचण्डनिकट एक नेताले बताए।
'प्रधानमन्त्री ओलीले कार्यकारी अध्यक्षको हैसियतले पूर्ण रूपमा पार्टी चलाउन मलाई आग्रह गर्नुभएको छ। उहाँलाई प्रधानमन्त्रीमा पाँचै वर्ष सहयोग गर्न पनि प्रस्ताव गर्नुभएको छ,' प्रचण्डको भनाइ उद्धृत गर्दै ती नेताले भने।
अब बस्ने केन्द्रीय समिति बैठकमार्फत् महाधिवेशन आयोजक समिति र अन्य उपसमितिहरू बनाउने प्रस्ताव आएको पनि उनले जानकारी दिए। कतिपय प्रदेशका मुख्यमन्त्री र पार्टीका इन्चार्जहरू फेर्न सकिने प्रस्तावसमेत प्रधानमन्त्री ओलीले राखेको प्रचण्डले ब्रिफिङमा बताएका थिए।
स्रोतअनुसार सहमतिको खाका तयार पार्न आज कार्यदल गठन हुनेछ। आजको बैठकले कार्यदलमा को-को सदस्य रहने निर्धारण गरेर जिम्मेवार तोक्ने सम्भावना छ।
'विष्णु पौडेल र शंकर पोखरेलले ल्यापटपबाट सहमतिका प्रस्ताव पढेर सुनाउनुभएको थियो रे। त्यसमा प्रचण्ड कमरेडले सकारात्मक छ, पछि कुरा गरौंला भनेर आउनुभएको रहेछ,' भेलामा सहभागी अर्का नेताले भने, 'अहिलेसम्म भएका गल्तीको समीक्षा गरेर अघि बढ्नुपर्छ र पार्टी एकताको भावनाअनुसार काम गर्नुपर्छ भन्ने प्रस्ताव रहेको थियो।'
