काठमाडौं उपमहानगरकी उपमेयर हरिप्रभा खड्गीले कोरोना महामारीमा जनताले दु:ख पाएकाले समाधानका लागि सभापति शेरबहादुर देउवाले सरकारको ध्यानाकर्षण गराउनुपर्ने बताएकी छन्।
जनताका दु:ख र पीडाबारे तत्काल सरकारको ध्यानाकर्षण गर्न खड्गीले सभापति देउवालाई आग्रह गरेकी हुन्।
‘जनताका दु:ख कांग्रेसले टुलुटुलु हेरेर बस्न मिल्दैन। यो जनताको पार्टी भएकोले जनताका दु:ख हटाउन सरकारको ध्यानाकर्षण गराउनुपर्छ। सभापति, सहमहामन्त्री लगायतले छिटो सरकारको ध्यानाकर्षण गराउनुपर्यो,’ कोरोना रोकथाम तथा नियन्त्रणबारे अनुगमन गर्न कांग्रेसले बनाएको अनुगमन समितिले सोमबार गरेको भर्चुअल कार्यक्रममा खड्गीले भनिन्।
अनुगमन समिति संयोजकमा सहमहामन्त्री प्रकाशशरण महत छन्। उक्त समितिको आयोजनामा कांग्रेसले सातै प्रदेशमा कोरोना रोकथाम तथा नियन्त्रणमा सरकारका कामकारबाही र कांग्रेसको भूमिकाबारे अन्तर्क्रिया गर्दै आइरहेको छ।
सोमबार समितिले बागमती प्रदेशका नेता/कार्यकर्तासँग छलफल गरेको हो।
उक्त छलफलमा भाग लिएकी उपमेयर खड्गीले कोरोनाबाट काठमाडौंमा अहिलेसम्म ३८ जनाको मृत्यु भइसकेको बताइन्।
उनले पिसीआर परीक्षणको दायरा पहिलेभन्दा बढाइएको जानकारी दिइन्।
‘लकडाउन गर्न नपर्ने बेला सरकारले लकडाउन गर्यो। केन्द्र सरकारमा दुरदर्शीता देखिएन,’ उनले भनिन्, ‘महानगरबाट आठ करोडको राहत वितरण गरिएको थियो। त्यो बेला राहत बाँड्ने बेला पनि भएको रहेनछ।’
उनले कोरोना रोकथाममा केन्द्र सरकारले खासै सहयोग नगरेको बताइन्।
स्थानीय तहकै पैसाले राहतलगायतका सहयोग गरिएको उनको भनाइ छ।
‘केन्द्र सरकारले कोरोना रोकथामका क्षेत्रमा १२ अरब सिध्यायो भन्छ। तर स्थानीय तहलाई केही गरेको छैन। हामीले राहत पनि महानगरकै खर्चमा बाँडेको हो,’ उनले भनिन्।
आफूलाई काम गर्न मेयरले सहयोग नगरेको पनि उनको दुखेसो छ।
भृकुटीमण्डपमा आइसोलेसन बनाउन आफूले बोर्ड बैठकमा माग गरे पनि सुनुवाइ नभएको उनले बताइन्।
यसबीचमा मेयर विद्यासुन्दर शाक्य कोरोना संक्रमित भएर आइसोलेसनमा बस्दा पनि आफूलाई कार्यवाहक नदिएको उनको भनाइ छ।
‘उहाँले कार्यवाहक पनि दिनुभएन। राजनीतिक रूपमा मात्रै हेर्नुभयो,’ उनले भनिन्। उपमेयर खड्गीका अनुसार फुटपाथ र ठेला व्यापारले झन् कोरोना संक्रमण फैलन सक्छ।
‘निषेधाज्ञा खोलेपछि ठेला र फुटपाथ व्यापार भइरहेका छन्। मैले सिडिओलाई भेटेर उक्त निर्णय फिर्ता लिन भनेकी छु,’ उनले भनिन्।
