प्रमुख प्रतिपक्षी नेपाली कांग्रेसले महिला हिंसा, बलात्कार र हत्याका बढ्दो घटना निरूपण एवं निराकरणका लागि गम्भीर बहस र पहलकदमीको अपील गरेको छ।
पछिल्लो दुई महिनामा देशको विभिन्न भागमा बलात्कारका घटना व्यापक वृद्धि भएकोले गम्भीरतापूर्वक लिएर सचेतना, सुरक्षा, गहिरो अनुसन्धान र दोषीलाई कारबाहीको प्रक्रियामा ल्याउन कांग्रेसले सरकारलाई आग्रह गरेको हो।
‘बितेको साता बालिकाहरू उपर शृङ्खलाबद्ध रूपमा हिंसा, बलात्कार र हत्याका घटना भएको विवरणले सिंगो मुलुकलाई मर्माहत तुल्याएको छ,’ प्रवक्ता विश्वप्रकाश शर्माले सोमबार निकालेको विज्ञप्तिमा भनिएको छ।
गत असोज ७ गते बझाङको मष्टा गाउँपालिकामा १२ वर्षीया बालिकाको बलात्कारपछि हत्या, असोज ८ गते उदयपुरको चौदण्डिगढीमा एक ७ वर्षीया बालिकाको बलात्कार, असोज ९ गते सुनसरीको बराहक्षेत्रको कटहरेमा ११ वर्षीया बालिकाको बलात्कार प्रयासपछि हत्या भएकोले समाजमा विसंगति र अपराध बढिरहेको कांग्रेसको भनाइ छ। सचेतना अभियानमा कमजोरी वा कानूनको कार्यान्वयनमा फितलोपनले त यस्ता घटना भइरहेका छैनन् भन्ने प्रश्नसमेत खडा भएको विज्ञप्तिमा उल्लेख छ।
‘बझाङको घटनामा डेढ महिनाअघि मात्रै बलात्कारको अर्को घटनामा ‘मिलापत्र’ मार्फत् ‘उन्मुक्ति’ पाएका युवकको संलग्नता रहेको विवरणले पछिल्लो घटना हुनुमा व्यक्ति, प्रवृत्ति, समाज र सरकारसमेत जिम्मेवार रहेको पुष्टि हुन्छ,’ शर्माले निकालेको विज्ञप्तिमा भनिएको छ।
बालिका बलात्कारको घटना या महिला उपरका अन्य हिंसात्मक सन्दर्भहरूमा समाजको उच्च सतर्कता, गम्भीर बहस, राज्यको प्रभावकारी उपस्थिति तथा राजनीतिक दल एवं संघसंस्थाको ऐक्यवद्ध सचेतनाको अभियान आवश्यक रहेको पनि शर्माले उल्लेख गरेका छन्।
‘यी विषयको गम्भीरताप्रति सम्पूर्ण रूपले गम्भीर बन्न कांग्रेस सरकार, दलहरू र समुदायलाई विशेष अपील गर्दछ,’ उनले भनेका छन्।
