संघीय प्रहरी ऐनसँग बाझिने गरी प्रदेश-२ सरकारले प्रहरी भर्ना लिने तयारी गरेको छ।
प्रदेश प्रहरी ऐन पारित भएको लगभग डेढ वर्षपछि प्रदेश सरकारले प्रहरी भर्ना लिने तयारी गरेको हो।
प्रदेश-२ का आन्तरिक मामिला तथा कानून मन्त्री ज्ञानेन्द्र कुमार यादवले प्रदेश सरकारले प्रहरी भर्ना लिने प्रक्रिया छिट्टै सुरू गर्ने बताएका छन्।
आज बसेको मन्त्री परिषदको बैठकमा आफूले प्रहरी भर्ना सम्बन्धि ठाडो प्रस्ताव लगेको र छठ पछि प्रहरी भर्ना लिने प्रक्रिया सुरू हुने मन्त्री यादवले जानकारी दिए।
'चाडपर्वको समय रहेकोले छठ अघि नै प्रक्रिया सुरू गर्नु उचित हुन्न' मन्त्री यादवले भने 'पर्व सके लगत्तै प्रहरी भर्नाका लागि आवेदन आह्वान गर्ने छौँ।'
उनका अनुसार प्रदेश सरकारले प्रहरी जवान, असई र इन्सपेक्टर पदका लागि आवेदन आह्वान गर्नेछ।
उनले भने, 'मन्त्रालयको सैद्धान्तिक सहमतिपछि मन्त्री परिषद बैठकमा प्रहरी भर्नाका लागि ठाडो प्रस्ताव लगेको थिएँ, छठपछि प्रक्रिया सुरू हुन्छ।'
आइतबार बसेको प्रदेश-२ को मन्त्रीपरिषद् बैठकमा प्रदेशसभाको चौथो अधिवेशन अन्त्य गर्ने सहमति भएको मन्त्री यादवले जानकारी दिए।
यसका अतिरिक्त प्रदेश सरकारको कर्मचारीहरूको सरुवा तथा काज सम्बन्धि कार्यविधि २०७७ स्वीकृत गर्ने, प्रदेशको राजपत्र निर्देशिका २०७७को मस्यौदा स्वीकृत गर्ने निर्णय भएको छ।
त्यस्तै प्रदेश विपत व्यवस्थापन सम्बन्धि प्रदेशको मस्यौदा निर्माणका लागि सैद्धान्तिक सहमति र दलित विकास समितिको उपाध्यक्ष पदको नियुक्ति गर्ने निर्णय गरिएको मन्त्री यादवले जानकारी दिए।
