नेपाली कांग्रेसकी केन्द्रीय सदस्य सुजाता कोइरालाले संसद पुनर्स्थापनाबिना चुनाव गर्न खोजे रक्तपात हुने बताएकी छन्।
आज रिपोर्टर्स क्लब नेपालमा बोल्दै उनले देशमा रक्तपात हुनबाट जोगाउन संसद पुनर्स्थापनाको विकल्प नभएको बताइन्।
सभापति शेरबहादुर देउवा संविधानको विपक्षमा उभिएर गम्भीर गल्ती गरिरहेको कोइरालाको टिप्पणी थियो।
असंवैधानिक तरिकाले संसद विघटन गरिएको अवस्थामा देउवाले रक्तपात हुनसक्ने चुनावको कुरा गर्नुले आशंका उत्पन्न भएको समेत बताइन्।
उनले देउवाको पछिल्लो गतिविधिमाथि केन्द्रीय कमिटी बैठकमा कुरा उठ्ने समेत बताइन्।
‘शेरबहादुर देउवाजी किन संविधानको पक्षमा हुनुहुन्न ? ओलीको किन पछि लागिरहनुभएको छ आश्चर्य लागेको छ,’ पूर्वउपप्रधानमन्त्री कोइरालाले भनिन्, ‘रक्तपात हुनसक्ने चुनावको कुरा गर्दै हुनुहुन्छ। तर, आफैंले ल्याएको संविधान र संसदको विपक्षमा किन बोलिराख्नुभएको छ, त्यो गलत हो।’
संसद पुनर्स्थापना नगरी चुनावमा जान खोजेमा रक्तपात हुने खतरा औंल्याइन्।
देशमा अर्को रक्तपात ल्याउने अवस्था आइरहँदा देउवाले बारम्बार चुनावको कुरा गरेकोमा आपत्ति जनाइन्।
उनले भनिन्,‘चुनावमा रक्तपात हुन्छ। देउवाजी ओलीको पक्षमा उभिएर मुलुकलाई रक्तपात र अस्थिरतामा नलानुहोस्।’
संसदबिना देश अगाडि बढ्न खोजे अर्को दुर्घटना हुने खतरा औंल्याइन्।
उनले भनिन्, ‘संसदबिना देशलाई अगाडि बढाउन खोजे यस्तो अवस्था आउँछ कल्पना पनि गर्न सक्नुहुन्न।’
चुनावको विपक्षमा आफूहरू नभएको तर त्यसका लागि संविधानलाई ट्रयाकमा ल्याउन जरूरी रहेको बताइन्।
सविधान पुनर्स्थापनाबिना चुनाव हुन नसक्ने र भएमा पनि रक्तपात हुने बताइन्।
३० वर्षदेखि देउवा बारम्बार प्रधानमन्त्री बन्दै आएको स्मरण गराउँदै भनिन्,‘३० वर्षदेखि देउवाजी प्रधानमन्त्री बन्दै आउनुभएको छ। फेरि फेरि तपाईं नै प्रधानमन्त्री बन्नुहोस् तर संसद पुनर्स्थापना गर्नुहोस्।’
संसदको विघटन राजनीतिक निर्णय भएकाले सडक आन्दोलनबाट भए पनि पुनर्स्थापना गर्ने बताइन्।
उनले कांग्रेस संसद पुनर्स्थापनाको पक्षमा आन्दोलनमा गइसकेको बताइन्। संसद पुनर्स्थापनाबिना कांग्रेस चुनावमा नजाने स्पष्ट पारिन्।
उनले भनिन्,‘आन्दोलनमा गएर भए पनि संसद पुनर्स्थापना गर्छौं।’
आफूहरूले अदालतको फैसला पर्खिरहेको समेत कोइरालाले बताइन्।
