नेपाली कांग्रेसका महामन्त्री गगन थापा राजनीतिक प्रतिवेदन लेख्न धुलिखेल गएका छन्।
विधानअनुसार विशेष महाधिवेशन अब बाध्यकारी रहेको महामन्त्रीद्वय गगन थापा र विश्वप्रकाश शर्माले निष्कर्ष निकालेका छन्।
त्यसअनुसार पुस २७ र २८ गते विशेष महाधिवेशन आयोजना गर्ने उनीहरूको तयारी छ।
‘महामन्त्री थापा राजनीतिक प्रतिवेदनलगायत दस्तावेज तयार गर्न केही दिन धुलिखेलमा रहनुहुन्छ,’ स्रोतले भन्यो, ‘अर्का महामन्त्री विश्वप्रकाश शर्माले विशेष महाधिवेशन आयोजनाबारे सभापति शेरबहादुर देउवालाई जानकारी गराउने र निम्तो दिने काम गर्नुहुन्छ।’
कांग्रेसका ५४ प्रतिशत महाधिवेशन प्रतिनिधिहरूले असोज २९ गते नै कार्यवाहक सभापति पूर्णबहादुर खड्कालाई भेटेर विशेष महाधिवेशन माग गरेका थिए।
तर यसबीचमा कांग्रेसले १५ औं महाधिवेशन कार्यतालिका ल्याएको थियो। त्यसअनुसार हिजो वडा र आज पालिका अधिवेशन भए पनि ती अधिवेशन भएनन्। क्रियाशील सदस्यता नै टुंगो लागेको थिएन।
विशेष महाधिवेशन विधानअनुसार ३ महिनाभित्र गर्नुपर्ने हुन्छ र त्यो अवधि पुस २८ मा सकिँदैछ। त्यसैले महामन्त्रीद्वय थापा र शर्माले विधान कार्यान्वयन गर्न भन्दै विशेष महाधिवेशन आयोजना गर्न लागेका छन्।
विशेष महाधिवेशन पक्षधरले भोलि पत्रकार सम्मेलन पनि गर्दैछन्। साथै भृकुटीमण्डपमा हल बुकिङ, पार्किङस्थल बुकिङलगायत कार्य पनि भइसकेको नेताहरूले जनाएका छन्।
सभापति शेरबहादुर देउवा पक्षका नेताहरूले भने आमनिर्वाचनको मुखमा विशेष महाधिवेशन गर्न नहुने बताइरहेका छन्।
-1746009348.jpg)
