नेपाल बार एसोसिएसनले सर्वोच्च अदालतमा गोलाप्रथाबाट पेशी तोक्ने प्रक्रियालाई स्वागत गर्दै प्रधानन्यायाधीशलाई भने गोलाप्रथामा भाग नलिन भनेको छ।
सोमबार बसेको नेपाल बारको बैठकले आफूले राजीनामा मागेका प्रधानन्यायाधीशलाई इजलास र मुद्दाको पेशी तोक्ने गोलाप्रक्रियामा सामेल नहुन, उनी सामेल भएमा उनको इजलासमा अरू न्यायाधीश नबस्न अनुरोध गर्ने निर्णय गरेको हो।
मंगलबार नेपाल बारले विज्ञप्ति जारी गर्दै न्यायाधीशमात्र होइन प्रधानन्यायाधीश राणा इजलास बसेमा उनको इजलासमा बहस गर्न नजान वकिलहरूलाई नेपाल बारले आग्रह गरेको छ।
'नेबाएले राजीनामा मागी सकेको प्रधानन्यायाधीश चोलेन्द्र शमसेर ज.ब.रा.ले गोलामा सहभागी नहुन, सहभागी भई इजलासमा बसेमा उनको इजलासमा अन्य माननीय न्यायाधीशहरूलाई उहाँ सम्मिलित संयुक्त/पूर्ण/संवैधानिक इजलासमा नबस्न, सुनुवाइ नगर्न र उहाँ र उहाँसमेत रहने इजलासमा बहस पैरवी नगरी सम्पूर्ण कानुन व्यवसायीज्यूहरूलाई नेबाएको निर्णय कार्यान्वयनमा सहयोग पुर्याउनु हुन अनुरोध गर्ने निर्णय भएको छ,' बारको विज्ञप्तिमा उल्लेख छ।
नेपाल बारले सर्वोच्चमा गोलाप्रथा लागु भए पनि उच्च र जिल्ला अदालतमा नभएको भन्दै आफ्नो आन्दोलन जारी रहेको बताएको छ।
साउन १७ गते सर्वोच्च अदालतले जिल्ला र उच्च अदालतमा गोलाप्रथा लागु गर्ने भन्दै जारी गरेको थियो। तर त्यसको कार्यान्वयनका लागि कुनै पहल नभएकामा नेपाल बार असन्तुष्ट बनेको छ।
'तर सर्वोच्च अदालत आफैंले मिति २०७८/०४/१७ गतेका दिन मिति २०७८ मंसिर १ गतेदेखि जिल्ला तथा उच्च अदालतमा गोला प्रणालीमार्फत पेसी तोकिने भनि पत्राचार गरेकोमा सो बमोजिम नगरी सर्वोच्च अदालत नियमावली मात्र संशोधन गरिएको र जिल्ला तथा उच्च अदालत नियमावली संशोधन नगरी पूर्वप्रतिबद्धता कार्यान्वयन नगरी उदासिन रहेको पाइएको छ,' बारको विज्ञप्तिमा भनिएको छ।
नेपाल बारले तत्काल जिल्ला, उच्च तथा विशेष अदालत नियमावली संशोधन गरी गोला प्रणाली लागू गर्ने, गराउने व्यवस्था मिलाउन सर्वोच्च अदालत फुलकोर्टसँग माग गरेको छ।
'उक्त संशोधन भई नआएसम्म विरोध स्वरूप जिल्ला, उच्च तथा विशेष अदालतहरूमा कालोपट्टी बाँधी दैनिक एक घण्टा धर्ना गरी बाँकी समयमा व्यवसाय गर्न, गराउन सम्पूर्ण एकाईहरूलाई लेखी पठाउने निर्णय भएको छ,' नेपाल बारको विज्ञप्तिमा भनिएको छ।
